ಪ್ರಕೃತಿಯಿಂದ ಪ್ರೇರಣೆಗೊಂಡು ಹಲವು ಕಟ್ಟಡಗಳು ರೂಪು ತಳೆದಿವೆ. ಅವುಗಳ ಪೈಕಿ ವಿಶೇಷ ಎನ್ನಿಸುವುದು ‘ನಾಟಿಲಸ್ ಹೌಸ್’. ಸಮುದ್ರದ ಸೊಬಗಿನಿಂದ ಸ್ಫೂರ್ತಿ ಪಡೆದು, ವಾಸ್ತುಶಿಲ್ಪಿಯ ಕೆತ್ತನೆಯಿಂದ ಜೀವಂತಗೊಂಡ ಈ ಕಟ್ಟಡ ಇರುವುದು ಮೆಕ್ಸಿಕೊದಲ್ಲಿ.
ಇದು ವಾಸ್ತುಶಿಲ್ಪಿ ಜಾವಿಯರ್ ಸೆನೊಶಿಯನ್ ಅವರ ಕನಸು. ಥೇಟ್ ಶಂಖದ ರೀತಿಯಲ್ಲಿಯೇ ಇರುವ ಈ ಮನೆ ಹಲವು ಬಣ್ಣಗಳಿಂದ ಕಂಗೊಳಿಸುತ್ತದೆ. ಆಧುನಿಕ ಮತ್ತು ಸಮಕಾಲೀನ ವಿನ್ಯಾಸಗಳ ಸಮ್ಮಿಳಿತವನ್ನು ಈ ಕಟ್ಟಡದಲ್ಲಿ ಕಾಣಬಹುದು.
ಪ್ರಕೃತಿಯ ಸಹಜ ಸೌಂದರ್ಯವನ್ನು ಪ್ರತಿಬಿಂಬಿಸುವ ಈ ಮನೆಯಲ್ಲಿ ಮೂರು ಮಂದಿ ವಾಸವಿದ್ದಾರೆ. ಒಳಾಂಗಣ ವಿನ್ಯಾಸವೂ ಸೊಗಸಾಗಿದೆ. ಗಿಡಗಳು, ವರ್ಣಮಯವಾದ ಗಾಜಿನ ಅಲಂಕಾರಿಕ ವಸ್ತುಗಳು, ವಿಭಿನ್ನ ವಿನ್ಯಾಸದ ಮರದ ಪೀಠೋಪಕರಣಗಳನ್ನು ಎಷ್ಟು ನೋಡಿದರೂ ಸಾಲದು.