50 ವರ್ಷಗಳ ಹಿಂದೆ: ಶುಕ್ರವಾರ 9–7–1971

ಕನ್ನಡಾಂಬೆಯ ನೆಚ್ಚಿನ ಕುವರ ಅನಕೃ ನಿಧನ
ಬೆಂಗಳೂರು, ಜುಲೈ 8– ಕನ್ನಡ ಕಾದಂಬರಿಯ ಸಾರ್ವಭೌಮ ಅನಕೃ ಇಂದು ರಾತ್ರಿ ಸುಮಾರು 10.30ರ ಸಮಯದಲ್ಲಿ ಇಲ್ಲಿ ನಿಧನರಾದರು.

ಕನ್ನಡ ಕಾದಂಬರಿಯಿಂದ ಹಿಡಿದು ಕನ್ನಡ ಚಳವಳಿಯವರೆಗೆ ನಾಡು–ನುಡಿಗಾಗಿ ನಿರಂತರ ಹೋರಾಟ ನಡೆಸಿದ ಅ.ನ.ಕೃಷ್ಣರಾಯರನ್ನು ಉಳಿಸಲು ನಗರದ ನರ್ಸಿಂಗ್‌ ಹೋಮಿನ ವೈದ್ಯರು ವಿಶೇಷವಾಗಿ ಪ್ರಯತ್ನಿಸಿದರು.

ಹೇಮಾವತಿ ಅಣೆ ಕಾರ್ಯ ತಡೆಗೆ ಕೇಂದ್ರಕ್ಕೆ ಒತ್ತಾಯ
ಮದ್ರಾಸ್‌, ಜುಲೈ 8– ಕಾವೇರಿ ಜಲವಿವಾದವನ್ನು ತಕ್ಷಣ ಪಂಚಾಯಿತಿಗೆ ಒಪ್ಪಿಸುವಂತೆ ಹಾಗೂ ಹೇಮಾವತಿ ಮತ್ತಿತರ ಕಾವೇರಿ ಯೋಜನೆಗಳ ನಿರ್ಮಾಣ ಕಾರ್ಯದಲ್ಲಿ ಮುಂದುವರಿಯದಂತೆ ಮೈಸೂರು ಸರ್ಕಾರವನ್ನು ತಡೆಯುವಂತೆ ತಮಿಳುನಾಡು ವಿಧಾನಸಭೆ ಕೇಂದ್ರ ಸರ್ಕಾರವನ್ನು ಒತ್ತಾಯಪಡಿಸಿದೆ.

ಕೇಂದ್ರ ಸರ್ಕಾರವನ್ನು ಈ ರೀತಿ ಒತ್ತಾಯಪಡಿಸುವ ನಿರ್ಣಯವೊಂದನ್ನು ವಿಧಾನಸಭೆ ಇಂದು ಸರ್ವಾನುಮತದಿಂದ ಅಂಗೀಕರಿಸಿತು.