ಪ್ರಜಾವಾಣಿ 50 ವರ್ಷಗಳ ಹಿಂದೆ | ಮಂಗಳವಾರ, 22–9–1970

ಯುಕ್ತ ನಿರ್ಬಂಧ ವಿಧಿಸುವ 144ನೇ ವಿಧಿ ಕ್ರಮಬದ್ಧ
ನವದೆಹಲಿ, ಸೆ. 21– ಅಪರಾಧ ನಿರೋಧ ಕುರಿತ ಕ್ರಿಮಿನಲ್‌ ಪ್ರೊಸೀಜರ್‌ ಕೋಡ್‌ನ 144, 117 ಹಾಗೂ ಇತರ ವಿಧಿಗಳ ರೀತಿ ಒದಗಿಸಲಾಗಿರುವ ಅವಕಾಶಗಳು ಸಂವಿಧಾನಬದ್ಧವಾದವುಗಳೆಂದು ಸುಪ್ರೀಂ ಕೋರ್ಟ್‌ನ ಏಳು ಮಂದಿ ನ್ಯಾಯಾಧೀಶರ ವಿಶೇಷ ಪೀಠ ಇಂದು ತೀರ್ಪಿತ್ತಿತು.

‘ಸಂವಿಧಾನದ 32ನೇ ವಿಧಿಯಂತೆ, ಸ್ಥಳದಿಂದ ಸ್ಥಳಕ್ಕೆ ಚಲಿಸಲು ಹಾಗೂ ಶಾಂತಿಯುತವಾಗಿ ಸಭೆ ಸೇರಲು ತಮಗಿರುವ ಮೂಲಭೂತ ಹಕ್ಕನ್ನು ಈ ವಿಧಿಗಳು ಉಲ್ಲಂಘಿಸುತ್ತವೆಂದು ಸಂಸತ್‌ ಸದಸ್ಯರಾದ ಮಧು ಲಿಮಯೆ ಮತ್ತು ಎಸ್‌.ಎ. ಡಾಂಗೆ ಅವರು ರಿಟ್‌ ಅರ್ಜಿ ಸಲ್ಲಿಸಿದ್ದರು.

ಭೂ ಗ್ರಹಣ ಚಳವಳಿ ಸಂಬಂಧದಲ್ಲಿ ಕಳೆದ ತಿಂಗಳು ಉತ್ತರ ಪ್ರದೇಶ ಸರ್ಕಾರ ಅವರನ್ನು ಬಂಧಿಸಿತ್ತು.

ಉದ್ಯಮ ನಿರ್ವಹಣೆ ಶಿಕ್ಷಣಕ್ಕೆ ಯುನೆಸ್ಕೊ ನೆರವು
ನವದೆಹಲಿ, ಸೆ. 21– ಅಭಿವೃದ್ಧಿಶೀಲ ರಾಷ್ಟ್ರಗಳ ವಿಶ್ವವಿದ್ಯಾನಿಲಯಗಳಲ್ಲಿ ವಾಣಿಜ್ಯೋದ್ಯಮ ಮತ್ತು ಉದ್ಯೋಗಿಗಳ ಮೇಲ್ವಿಚಾರಣೆ ವಿಷಯಗಳಲ್ಲಿ ಶಿಕ್ಷಣ ಕೊಡಲು ವಿಶ್ವಸಂಸ್ಥೆಯ ಶೈಕ್ಷಣಿಕ, ವೈಜ್ಞಾನಿಕ ಮತ್ತು ಸಾಂಸ್ಕೃತಿಕ ಸಂಸ್ಥೆ (ಯುನೆಸ್ಕೊ) ಪ್ರಥಮ ಬಾರಿಗೆ ಸಹಾಯ ಮಾಡಲಿದೆ.