ಸಿಡಿಲ ಸಾವು

ಬರದ ಬೇಗೆಯಲ್ಲಿ ಬೆಂಕಿಯಂಥ ಮಳೆ
ಬೆಂದ ಜೀವಕ್ಕೆ ಮಿಂಚು ಸಿಡಿಲಿನಾ ಕಳೆ!
ತಣ್ಣಗಾಗಲಿಲ್ಲ ಇಳೆ, ಬೆಳಗಲಿಲ್ಲ ಬೆಳೆ
ಬಳಲಿದಾ ಜೀವಗಳಿಗೆ
ಬಿಸಿಲ ಬಾಣಲೆಯಲ್ಲಿ
ನೀರ ಮಾಯಾಂಗನೆಯ ಆಟ;
ಕುದಿವ ಪ್ರಕೃತಿಯಲ್ಲಿ ಕೇಕೆ ಹಾಕುತ್ತಿದೆ
ಸಾವಿನ ಓಟ
ಭೂರಮೆಯ ಬಗೆದ ಬಲ್ಲಿದರೆಲ್ಲಾ
ತಂಪಿನರಮನೆಯಲ್ಲಿ,
ತುತ್ತು ಅನ್ನಕ್ಕೆ ಕೈ ಹೊತ್ತವರು
ಆಪು, ಹೆಂಚಿನ, ತಡಿಕೆಯಲ್ಲಿ;
ಪಡೆದು ಧನ್ಯರಾಗಿದ್ದಾರೆ
ಪುಣ್ಯದಾ ಸಾವು
ಬದುಕಿರುವ ಪಾಪಿಗಳಿಗೆ
ಬಿಡುವುದಿಲ್ಲ ಇವರ ಶಾಪದಾ ಕಾವು!!