ವಿದ್ಯಾಗೆ ಬಂಗಾಲಿ ಇಷ್ಟವಂತೆ

ನಿಮಗೆ ‘ಪರಿಣೀತಾ’ ಫಿಲಂ ನೆನಪಿದ್ಯಾ? ಭಾವುಕ ನೆಲೆಯಲ್ಲಿ ತೇಲಿ ಹೋಗುವ ಪ್ರೇಮಕತೆ, ವಿದ್ಯಾ ಸದಾ ನೆನಪಿನಲ್ಲಿ ಉಳಿಯುವ ಮಧುರ ಹಾಡುಗಳು, ಹಸಿಬಿಸಿ ದೃಶ್ಯಗಳು ಇತ್ಯಾದಿ ಇತ್ಯಾದಿ… 2005ರಲ್ಲಿ ತೆರೆಕಂಡ ಈ ಚಿತ್ರ ವಿದ್ಯಾ ಬಾಲನ್‌ರ ಅಭಿನಯ ಸಾಮರ್ಥ್ಯವನ್ನು ದೇಶಕ್ಕೆ ಸಾರಿ ಹೇಳಿತು. ಮಾತ್ರವಲ್ಲ, ಆಕೆಗೆ ಬಂಗಾಲಿಗಳ ಜೊತೆಗೆ ಶಾಶ್ವತ ನಂಟನ್ನೂ ಬೆಸೆದುಕೊಟ್ಟಿತು.

ಇದಾದ ನಂತರ ವಿದ್ಯಾ ಅಭಿನಯದ ಹಲವು ಸಿನಿಮಾಗಳ ಚಿತ್ರೀಕರಣ ಕೊಲ್ಕತ್ತಾದಲ್ಲಿ ನಡೆಯಿತು. ಈ ಸಂದರ್ಭದಲ್ಲಿ ಬಂಗಾಲಿ ಕಲಿಯಲು ಆರಂಭಿಸಿದ ನಟಿಗೆ ಆ ಭಾಷೆಯ ಮೇಲೆ ಒಂದು ಮಟ್ಟದ ಪ್ರಭುತ್ವವೂ ಸಿಕ್ಕಿದೆ. ಅವರು ಇದೀಗ ಬಂಗಾಲಿ ಜಾಹೀರಾತುಗಳಿಗೆ ತಮ್ಮದೇ ದನಿಯನ್ನೂ ಕೊಡುತ್ತಿದ್ದಾರೆ.

ಬಂಗಾಲಿ ಸಿನಿ ಜಗತ್ತಿನೊಂದಿಗೆ ನಂಟು ಹೊಂದಿರುವ ವಿದ್ಯಾ, ಶೂಟಿಂಗ್ ವೇಳೆ ನಿರ್ದೇಶಕರೊಂದಿಗೆ ಬಂಗಾಲಿಯಲ್ಲೇ ಸಂವಾದಿಸುತ್ತಾರೆ. ಪಶ್ಚಿಮ ಬಂಗಾಳದಲ್ಲೇ ಹುಟ್ಟಿ ಬೆಳೆದವರಂತೆಯೇ ಸುಲಲಿತವಾಗಿ ಮಾತಾಡುವ ಅವರ ಧಾಟಿ ಕಂಡು ಬಂಗಾಲಿಗಳೇ ಮರುಳಾಗಿದ್ದಾರೆ.