ಪಟ್ಟು ಸಡಲಿಸದ ಐಒಸಿ

ಲೂಸಾನ್ (ಪಿಟಿಐ): `ಒಲಿಂಪಿಕ್ ಕೂಟದಿಂದ ಡೌ ಕಂಪೆನಿಯ ಪ್ರಾಯೋಜಕತ್ವವನ್ನು ಕೈ ಬಿಡುವ ಪ್ರಶ್ನೆಯಿಲ್ಲ. ಈ ನಿರ್ಧಾರದಲ್ಲಿ ಯಾವುದೇ ಬದಲಾವಣೆಯಿಲ್ಲ. ಇದು  ಸ್ಪಷ್ಟ...~

-ಹೀಗೆ ನಿಖರವಾಗಿ ಹೇಳಿದ್ದು ಅಂತರರಾಷ್ಟ್ರೀಯ ಒಲಿಂಪಿಕ್ಸ್ ಸಮಿತಿ (ಐಒಸಿ). ಡೌ ಕಂಪೆನಿಯನ್ನು ಪ್ರಾಯೋಜಕತ್ವದಿಂದ ಕೈ ಬಿಡಬೇಕು ಎನ್ನುವ ಭಾರತದ ಬೇಡಿಕೆಗೆ ಐಒಸಿ ನೀಡಿದ ಕಠೋರ ಉತ್ತರವಿದು.

`1984ರ ಭೋಪಾಲ್ ಅನಿಲ ದುರಂತಕ್ಕೆ ಡೌ ಕಂಪೆನಿ ಜವಾಬ್ದಾರಿ ಅಲ್ಲ ಎಂಬುದು ನಮಗೆ ಗೊತ್ತಿದೆ. ನಮ್ಮ  ನಿರ್ಧಾರ ಸ್ಪಷ್ಟ. ಈ ದುರಂತದಿಂದ 25,000ಕ್ಕೂ ಹೆಚ್ಚು ಜನ ಮೃತಪಟ್ಟಿದ್ದಾರೆ. ಸಾಕಷ್ಟು ಜನ ನೋವಿನಿಂದ ನರಳಿದ್ದಾರೆ ಎನ್ನುವುದೂ ತಿಳಿದಿದೆ~ ಎಂದು ಐಒಸಿ ಅಧ್ಯಕ್ಷ ಜಾಕ್ ರಾಗ್ ಹೇಳಿದ್ದಾರೆ.

ಭಾರತ ಒಲಿಂಪಿಕ್ಸ್ ಸಂಸ್ಥೆ (ಐಒಎ) ಈ ವಿಷಯದಲ್ಲಿ ಐಒಸಿಗೆ ಮನವರಿಕೆ ಮಾಡಿಕೊಡುವಲ್ಲಿ ವಿಫಲವಾಗಿದೆ ಎನ್ನುವ ಕಾರಣಕ್ಕಾಗಿ ಭಾರತ ಸರ್ಕಾರ ಮಧ್ಯ ಪ್ರವೇಶ ಮಾಡಿತ್ತು. ಈಗ ಸರ್ಕಾರದ ಎರಡನೇ ಸಲದ ಒತ್ತಾಯಕ್ಕೂ ಐಒಸಿ ತನ್ನ ನಿರ್ಧಾರದಲ್ಲಿ ಪಟ್ಟು ಸಡಲಿಸಿಲ್ಲ.