ಬೆಳ್ಳಿ ಗೆದ್ದ ವಿಕಾಸ್‌ ಗೌಡ

ನವದೆಹಲಿ (ಪಿಟಿಐ): ಕರ್ನಾಟಕದ ಡಿಸ್ಕಸ್‌ ಎಸೆತಗಾರ ವಿಕಾಸ್‌ ಗೌಡ ದೋಹಾದಲ್ಲಿ ನಡೆದ ಐಎಎಎಫ್‌ ಡೈಮಂಡ್‌ ಲೀಗ್‌ ಅಥ್ಲೆಟಿಕ್ಸ್‌ನಲ್ಲಿ ಬೆಳ್ಳಿ ಪದಕ ಜಯಿಸಿದ್ದಾರೆ.

ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ವಿಕಾಸ್‌ ಡಿಸ್ಕಸ್‌ ಅನ್ನು 63.23 ಮೀ. ದೂರ ಎಸೆದು ಎರಡನೇ ಸ್ಥಾನ ಪಡೆದುಕೊಂಡರು. ಪೋಲೆಂಡ್‌ನ ಪಿಯೊಟರ್‌ ಮಲಾಚೊವ್‌ಸ್ಕಿ (66.72 ಮೀ.) ಚಿನ್ನದ ಪದಕ ತಮ್ಮದಾಗಿಸಿಕೊಂಡರು.

ಎಸ್ಟೋನಿಯದ ಗರ್ಡ್‌ ಕ್ಯಾಂಟರ್‌ (62.90 ಮೀ.) ಮೂರನೇ ಸ್ಥಾನ ಪಡೆದು ಕಂಚಿನ ಪದಕ ಗಿಟ್ಟಿಸಿಕೊಂಡರು.
2010ರ ಏಷ್ಯನ್‌ ಕ್ರೀಡಾಕೂಟದಲ್ಲಿ ಕಂಚು ಜಯಿಸಿದ್ದ ವಿಕಾಸ್‌ ಅವರ ವೈಯಕ್ತಿಕ ಶ್ರೇಷ್ಠ ಸಾಧನೆ 66.90 ಮೀ. ಆಗಿದೆ. 2013 ರಲ್ಲಿ ಅವರಿಂದ ಈ ಸಾಧನೆ ಮೂಡಿಬಂದಿತ್ತು.

ಟಿಂಟುಗೆ ಆರನೇ ಸ್ಥಾನ: ಮಹಿಳೆಯರ 800 ಮೀ. ಓಟದಲ್ಲಿ ಭಾರತದ ಟಿಂಟು ಲೂಕಾ ಆರನೇ ಸ್ಥಾನ ಪಡೆದರು.
ಕೇರಳದ ಅಥ್ಲೀಟ್‌ ನಿಗದಿತ ಗುರಿಯನ್ನು 2:00:56 ಸೆಕೆಂಡ್‌ಗಳಲ್ಲಿ ಕ್ರಮಿಸಿದರು. ಕೀನ್ಯಾದ ಯೂನೈಸ್‌ ಜೆಪ್ಕೊಚ್‌ (1:59.33) ಈ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದುಕೊಂಡರು.

ಅಮೆರಿಕದ ಶಾನೆಲ್‌ ಪ್ರೈಸ್‌ (1:59:75) ಮತ್ತು ಜೆಕೊಸ್ಲೊವಾಕಿಯದ ಲೆನ್ಕಾ ಮನ್ಸಾ (2:00:20) ಕ್ರಮವಾಗಿ ಬೆಳ್ಳಿ ಹಾಗೂ ಕಂಚಿನ ಪದಕ ಪಡೆದರು.