ವಿಲ್ಲಾರಿಯಲ್‌ ಸವಾಲು ಮೀರಿದ ಬಾರ್ಸಿಲೋನಾ
ಮಿಂಚಿದ ಒಸಮಾನ್‌, ಲಯೊನೆಲ್‌ ಮೆಸ್ಸಿ
ಬಾರ್ಸಿಲೋನಾ: ಒಸಮಾನ್‌ ಡೆಂಬೆಲ್‌ ಮತ್ತು ಲಯೊನೆಲ್‌ ಮೆಸ್ಸಿ ಅವರ ಉತ್ತಮ ಆಟದ ನೆರವಿನಿಂದ ಬಾರ್ಸಿಲೋನಾ ತಂಡ ಲಾ ಲಿಗಾ ಫುಟ್‌ಬಾಲ್‌ ಟೂರ್ನಿಯ ಪಂದ್ಯದಲ್ಲಿ ಗೆದ್ದಿದೆ.
ಕ್ಯಾಂಪ್‌ ನುವಾ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಹಣಾಹಣಿಯಲ್ಲಿ ಬಾರ್ಸಿಲೋನಾ 5–1 ಗೋಲುಗಳಿಂದ ವಿಲ್ಲಾರಿಯಲ್‌ ತಂಡವನ್ನು ಸೋಲಿಸಿತು.
ಪಾಯಿಂಟ್ಸ್‌ ಪಟ್ಟಿಯಲ್ಲಿ ಅಗ್ರಸ್ಥಾನ ಗಳಿಸಿ ಈಗಾಗಲೇ ಪ್ರಶಸ್ತಿ ತನ್ನದಾಗಿಸಿಕೊಂಡಿರುವ ಬಾರ್ಸಿಲೋನಾ ತಂಡ ಈ ಪಂದ್ಯದಲ್ಲಿ 4–3–3ರ ಯೋಜನೆಯೊಂದಿಗೆ ಕಣಕ್ಕಿಳಿದಿತ್ತು.
ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಅಣಿಯಾದ ಆ್ಯಂಡ್ರೆಸ್‌ ಐನೆಸ್ಟಾ ಪಡೆ 11ನೇ ನಿಮಿಷದಲ್ಲಿ ಖಾತೆ ತೆರೆಯಿತು. ಫಿಲಿಪ್‌ ಕುಟ್ಹಿನೊ ಗೋಲು ದಾಖಲಿಸಿದರು.
16ನೇ ನಿಮಿಷದಲ್ಲಿ ಪೌಲಿನ್ಹೊ ಮೋಡಿ ಮಾಡಿದರು. ಚೆಂಡನ್ನು ಡ್ರಿಬಲ್‌ ಮಾಡುತ್ತಾ ಎದುರಾಳಿ ತಂಡದ ರಕ್ಷಣಾ ಕೋಟೆ ಭೇದಿಸಿದ ಅವರು ಅದನ್ನು ಚುರುಕಾಗಿ ಗುರಿ ತಲುಪಿಸಿದರು.
45ನೇ ನಿಮಿಷದಲ್ಲಿ ಮೆಸ್ಸಿ ಕಾಲ್ಚಳಕ ತೋರಿದರು. ಸಹ ಆಟಗಾರ ತಮ್ಮತ್ತ ತಳ್ಳಿದ ಚೆಂಡಿನ ಮೇಲೆ ನಿಯಂತ್ರಣ ಸಾಧಿಸಿದ ಅವರು ಅದನ್ನು ಎದುರಾಳಿ ಆವರಣದ 30 ಗಜ ದೂರದಿಂದ ಒದ್ದು ಗುರಿ ಮುಟ್ಟಿಸಿದರು. ಹೀಗಾಗಿ ಬಾರ್ಸಿಲೋನಾ ತಂಡ ಮುನ್ನಡೆಯನ್ನು 3–0ಗೆ ಹೆಚ್ಚಿಸಿಕೊಂಡು ವಿರಾಮಕ್ಕೆ ಹೋಯಿತು.
ದ್ವಿತೀಯಾರ್ಧದ ಆರಂಭದಲ್ಲಿ ವಿಲ್ಲಾರಿಯಲ್‌ ಹಿನ್ನಡೆ ತಗ್ಗಿಸಿಕೊಂಡಿತು. ಈ ತಂಡದ ನಿಕೊಲಾ ಸ್ಯಾನ್‌ಸೋನ್‌ 54ನೇ ನಿಮಿಷದಲ್ಲಿ ಗೋಲು ಹೊಡೆದರು.
ನಂತರ ಬಾರ್ಸಿಲೋನಾ ತಂಡದ ಒಸಮಾನ್‌ ಮಿಂಚಿದರು. 87ನೇ ನಿಮಿಷದಲ್ಲಿ ಗೋಲು ಬಾರಿಸಿದ ಅವರು ಮುನ್ನಡೆಯನ್ನು 4–1ಕ್ಕೆ ಹೆಚ್ಚಿಸಿದರು. 90+3ನೇ ನಿಮಿಷದಲ್ಲಿ ವೈಯಕ್ತಿಕ ಎರಡನೇ ಗೋಲು ಗಳಿಸಿ ತವರಿನ ಅಭಿಮಾನಿಗಳ ಪ್ರೀತಿಗೆ ಪಾತ್ರರಾದರು.
ರಿಯಲ್‌ ಮ್ಯಾಡ್ರಿಡ್‌ಗೆ ನಿರಾಸೆ: ಇನ್ನೊಂದು ಪಂದ್ಯದಲ್ಲಿ ರಿಯಲ್‌ ಮ್ಯಾಡ್ರಿಡ್‌ ತಂಡ ನಿರಾಸೆ ಕಂಡಿತು. ಸೆವಿಲ್ಲಾ ತಂಡ 3–2 ಗೋಲುಗಳಿಂದ ರಿಯಲ್‌ ಮ್ಯಾಡ್ರಿಡ್‌ ತಂಡವನ್ನು ಮಣಿಸಿತು. ಸೆವಿಲ್ಲಾ ತಂಡದ ವಿಸಾಮ್‌ ಬೆನ್‌ ಯೆಡ್ಡೆರ್‌ ಮತ್ತು ಮಿಗುಯೆಲ್‌ ಲಯುನ್‌ ಕ್ರಮವಾಗಿ 26 ಮತ್ತು 45ನೇ ನಿಮಿಷಗಳಲ್ಲಿ ಗೋಲು ಬಾರಿಸಿದರು.
ರಿಯಲ್‌ ಮ್ಯಾಡ್ರಿಡ್‌ ಪರ ಬೊರ್ಜಾ ಮಯೋರಲ್‌ (87ನೇ ನಿ.) ಮತ್ತು ಸರ್ಜಿಯೊ ರಾಮೊಸ್‌ (90+5) ಗೋಲು ಹೊಡೆದರು. ರಾಮೊಸ್‌ 84ನೇ ನಿಮಿಷದಲ್ಲಿ ಚೆಂಡನ್ನು ತಮ್ಮದೇ ಗೋಲುಪೆಟ್ಟಿಗೆಯೊಳಗೆ ಒದ್ದರು. ಹೀಗಾಗಿ ಸೆವಿಲ್ಲಾ ಖಾತೆಗೆ ‘ಉಡುಗೊರೆ’ ರೂಪದಲ್ಲಿ ಗೋಲು ಸೇರ್ಪಡೆಯಾಯಿತು. ಇದರಿಂದಾಗಿ ತಂಡ ಗೆದ್ದಿತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.