ಹಾಕಿ: ಭಾರತಕ್ಕೆ ಮತ್ತೆ ಸೋಲು

ನವದೆಹಲಿ (ಪಿಟಿಐ): ಭಾರತದ ಆಟಗಾರ್ತಿಯರು ನ್ಯೂಜಿಲೆಂಡ್‌ನ ಪಕುರಂಗಾದಲ್ಲಿ ನಡೆಯುತ್ತಿರುವ ನಾಲ್ಕು ರಾಷ್ಟ್ರಗಳ ನಡುವಣ ಮಹಿಳಾ ಹಾಕಿಯ ಎರಡನೇ ಹಂತದ ಟೂರ್ನಿಯಲ್ಲಿ ಸತತವಾಗಿ ಎರಡನೇ ಪಂದ್ಯದಲ್ಲೂ ಸೋಲನುಭವಿಸಿದರು.

ಗುರುವಾರದ ಪಂದ್ಯದಲ್ಲಿ ಆಸ್ಟ್ರೇಲಿಯ ತಂಡವು 5-2 ಗೋಲುಗಳಿಂದ ಭಾರತವನ್ನು ಸೋಲಿಸಿತು.
ಆಸ್ಟ್ರೇಲಿಯ ಎರಡನೆ ನಿಮಿಷದಲ್ಲೇ ಷುಲ್ಜ್ ಅವರು ತಂದಿತ್ತ ಗೋಲಿನಿಂದ ಮುನ್ನಡೆ ಸಾಧಿಸಿತು. ಇದಾಗಿ ಹತ್ತನೇ ನಿಮಿಷದಲ್ಲಿ ಬೋಯ್ಸ ಮುನ್ನಡೆಯನ್ನು 2-0 ಗೋಲುಗಳಿಗೆ ಏರಿಸಿದರು. ನೆಲಕಚ್ಚಿ ಆಡಿದ ಭಾರತ ತಂಡದ ಪರ 13ನೇ ನಿಮಿಷದಲ್ಲಿ ಫಾರ್ವರ್ಡ್ ಆಟಗಾರ್ತಿ ರಾಣಿ ಗೋಲು ತಂದಿತ್ತು ಅಂತರವನ್ನು 1-2ಕ್ಕೆ ಇಳಿಸಿದರು. ಆದರೆ ಆಸ್ಟ್ರೇಲಿಯಾಕ್ಕೆ 28ನೇ ನಿಮಿಷದಲ್ಲಿ ಸಿಕ್ಕಿದ ಪೆನಾಲ್ಟಿ ಕಾರ್ನರ್ ಅವಕಾಶದಲ್ಲಿ ಷುಲ್ಜ್ ಗುರಿ ತಪ್ಪಲಿಲ್ಲ.

ಉತ್ತರಾರ್ಧದ ಆರಂಭದಿಂದಲೂ ಭಾರತ ದಾಳಿಗಿಳಿಯಿತು. ಆದರೆ ಚೆಂಡನ್ನು ಗುರಿ ಮುಟ್ಟಿಸುವಲ್ಲಿ ಮಾತ್ರ ಯಶಸ್ಸು ಗಳಿಸಲಿಲ್ಲ. ವಿರಾಮದ ವೇಳೆಗೆ 3-1ಗೋಲುಗಳಿಂದ ಮುಂದಿದ್ದ ಆಸ್ಟ್ರೇಲಿಯ, ಉತ್ತರಾರ್ಧದಲ್ಲಿ ಇನ್ನೂ 2ಗೋಲುಗಳನ್ನು ಗಳಿಸಿತು. ನೆಲ್ಸನ್ ಮತ್ತು ನ್ಯಾನ್‌ಸ್ಕಾವೆನ್ ತಂದಿತ್ತ ಈ ಎರಡು ಗೋಲುಗಳು ಭಾರತದ ಆಟಗಾರ್ತಿಯರ ಆತ್ಮವಿಶ್ವಾಸವೇ ಕುಸಿಯುವಂತೆ ಮಾಡಿತು.

ಆದರೆ 63ನೇ ನಿಮಿಷದಲ್ಲಿ ಭಾರತಕ್ಕೆ ಸಿಕ್ಕಿದ ಪೆನಾಲ್ಟಿ ಕಾರ್ನರ್ ಅವಕಾಶದಲ್ಲಿ ಅಸುಂತಾ ಲಾಕ್ರ ನೀಡಿದ ಚೆಂಡನ್ನು ಪೂನಮ್ ಗುರಿ ತಲುಪಿಸಿದರು.ಭಾರತ ಶನಿವಾರ ನ್ಯೂಜಿಲೆಂಡ್ ವಿರುದ್ಧ ಆಡಲಿದೆ.