ಹಾಕಿ: ಗೋಲಿನ ಮಳೆ ಸುರಿಸಿದ ಬೆಂಗಳೂರು ತಂಡ

ಇಂಫಾಲ (ಪಿಟಿಐ): ಬೆಂಗಳೂರು ಹಾಕಿ ಸಂಸ್ಥೆ ತಂಡದವರು 8ನೇ ರಾಷ್ಟ್ರೀಯ ಸೀನಿಯರ್‌ ಪುರುಷರ ಹಾಕಿ ಚಾಂಪಿಯನ್‌ಷಿಪ್‌ನ ‍ ಸೋಮವಾರದ ಪಂದ್ಯದಲ್ಲಿ ಗೋಲಿನ ಮಳೆ ಸುರಿಸಿದರು.

‘ಇ’ ಗುಂಪಿನ ಹಣಾಹಣಿಯಲ್ಲಿ ಬೆಂಗಳೂರಿನ ತಂಡ 15–0 ಗೋಲು ಗಳಿಂದ ಹಾಕಿ ಬಿಹಾರ ವಿರುದ್ಧ ಜಯಭೇರಿ ಮೊಳಗಿಸಿತು.

ಬೆಂಗಳೂರು ತಂಡದ ಎಚ್‌.ಟಿ. ರಮೇಶ್‌ 5, 53, 55, 57 ಮತ್ತು 59ನೇ ನಿಮಿಷಗಳಲ್ಲಿ ಗೋಲು ದಾಖಲಿಸಿದರು. ಸಿ.ಸ್ಟಾಲಿನ್‌ ಅಭಿಲಾಷ್‌ 27, 29, 39 ಮತ್ತು 56ನೇ ನಿಮಿಷಗಳಲ್ಲಿ ಎದುರಾಳಿಗಳ ರಕ್ಷಣಾಕೋಟೆ ಭೇದಿಸಿದರು. ಮಣಿಕಂಠ ಬೇಜವಾಡ (12, 41, 48) ಮತ್ತು ಎನ್‌. ಹೊನ್ನೂರು ಸ್ವಾಮಿ (13, 22,37ನೇ ನಿಮಿಷ) ಕೂಡ ಗೋಲು ಬಾರಿಸಿ ಗೆಲುವಿನ ಅಂತರ ಹೆಚ್ಚಿಸಿದರು.