ಮುಂಬೈ ಇಂಡಿಯನ್ಸ್‌ಗೆ ರೋಚಕ ಗೆಲುವು

ಮುಂಬೈ: ಸೋಲಿನ ಸುಳಿಯಿಂದ ತಂಡವನ್ನು ಮೇಲೆತ್ತಿದ ವೆಸ್ಟ್ ಇಂಡೀಸ್‌ನ ದೈತ್ಯ ಬ್ಯಾಟ್ಸ್‌ಮನ್‌ ಕೀರನ್ ಪೊಲಾರ್ಡ್‌ ವಾಂಖೆಡೆ ಕ್ರೀಡಾಂಗಣದಲ್ಲಿ ಸಿಕ್ಸರ್ ಮಳೆ ಸುರಿಸಿದರು. 10 ಸಿಕ್ಸರ್ ಒಳಗೊಂಡಂತೆ 31 ಎಸೆತಗಳಲ್ಲಿ 83 ರನ್ ಗಳಿಸಿದ ಅವರು ಮುಂಬೈ ಇಂಡಿಯನ್ಸ್‌ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟರು.

ಬುಧವಾರ ರಾತ್ರಿ ನಡೆದ ಪಂದ್ಯದಲ್ಲಿ ಕನ್ನಡಿಗ ಕೆ.ಎಲ್‌.ರಾಹುಲ್‌ (100; 64 ಎಸೆತ, 6 ಸಿಕ್ಸರ್‌, 6 ಬೌಂಡರಿ) ಅವರ ಅಬ್ಬರದ ಆಟದ ನೆರವಿನಿಂದ ಕಿಂಗ್ಸ್ ಇಲೆವನ್ ಪಂಜಾಬ್ ತಂಡ 197 ರನ್‌ ಗಳಿಸಿತ್ತು. ಕಠಿಣ ಗುರಿ ಬೆನ್ನತ್ತಿದ ಮುಂಬೈ ಇಂಡಿಯನ್ಸ್‌ ಆರಂಭದಿಂದಲೇ ರನ್ ಗಳಿಕೆಗೆ ಒತ್ತು ನೀಡಿತು. ಆದರೆ ವಿಕೆಟ್‌ಗಳು ಕಳೆದುಕೊಂಡ ಕಾರಣ ಒಂದು ಹಂತದಲ್ಲಿ ಸೋಲಿನ ಸುಳಿಯಲ್ಲಿ ಸಿಲುಕಿತ್ತು. ಈ ಸಂದರ್ಭದಲ್ಲಿ ಪೊಲಾರ್ಡ್‌ ಛಲದಂಕ ಮಲ್ಲನಂತೆ ಕ್ರೀಸ್‌ನಲ್ಲಿ ತಳವೂರಿದರು. ಅಂತಿಮ ಓವರ್‌ನಲ್ಲಿ ಅವರು ಔಟಾದರು. ಆದರೆ ವೆಸ್ಟ್ ಇಂಡೀಸ್‌ನ ಮತ್ತೊಬ್ಬ ಆಟಗಾರ ಅಲ್ಜಾರಿ ಜೋಸೆಫ್‌ ಗೆಲುವಿನ ರನ್ ಗಳಿಸಿ ಸಂಭ್ರಮ ಉಕ್ಕಿಸಿದರು.

ರಾಹುಲ್ ಅಬ್ಬರದ ಆಟ: ಕನ್ನಡಿಗ ಕೆ.ಎಲ್. ರಾಹುಲ್ ಶತಕದ ಅಬ್ಬರ ಮತ್ತು ಕ್ರಿಸ್ ಗೇಲ್ ಅರ್ಧಶತಕದ ಮಿಂಚಿನ ಆಟದ ಬಲದಿಂದ ಕಿಂಗ್ಸ್‌ ಇಲೆವನ್ ಪಂಜಾಬ್ ತಂಡ ಉತ್ತಮ ಮೊತ್ತ ಕಲೆ ಹಾಕಿತು. ಮುಂಬೈ ತಂಡದ ಬಲಿಷ್ಟ ಬೌಲರ್‌ಗಳ ಎಸೆತಗಳನ್ನು ರಾಹುಲ್ ಪುಡಿಗಟ್ಟಿದರು.

ರಾಹುಲ್ ಮತ್ತು ಗೇಲ್ 12.5 ಓವರ್‌ಗಳವರೆಗೆ ಬ್ಯಾಟಿಂಗ್ ಮಾಡಿದರು. ಗೇಲ್ ಎತ್ತಿದ ಏಳು ಸಿಕ್ಸರ್‌ಗಳು ಮತ್ತು ಮೂರು ಬೌಂಡರಿಗಳಿಂದಾಗಿ ಮುಂಬೈ ತಂಡದಲ್ಲಿ ಚಿಂತೆಯ ಕಾರ್ಮೋಡ ಆವರಿಸಿತ್ತು. ರಾಹುಲ್ ಆಕರ್ಷಕ ಶೈಲಿಯ ಬ್ಯಾಟಿಂಗ್ ಮೂಲಕ ಮಿಂಚಿದರು. ಹೋದ ಪಂದ್ಯದಲ್ಲಿ ಅವರು ಮಯಂಕ್ ಅಗರವಾಲ್ ಜೊತೆಗೂಡಿ ತಂಡಕ್ಕೆ ಗೆಲುವಿನ ಕಾಣಿಕೆ ನೀಡಿದ್ದರು. ಅವರು ಶತಕ ಪೂರೈಸಿದ ಸಂದರ್ಭದಲ್ಲಿ ಮುಂಬೈ ತಂಡದಲ್ಲಿರುವ ಅವರ ‘ಗೆಳೆಯ’ ಹಾರ್ದಿಕ್ ಪಾಂಡ್ಯ ಓಡಿ ಬಂದು ಅಭಿನಂದಿಸಿದರು. ಮೊದಲ ವಿಕೆಟ್‌ಗೆ ರಾಹುಲ್ ಮತ್ತು ಗೇಲ್ 116 ರನ್‌ಗಳನ್ನು ಸೇರಿಸಿದರು. 13ನೇ ಓವರ್‌ನಲ್ಲಿ ಕ್ರಿಸ್‌ ಗೇಲ್ ಔಟಾದ ನಂತರ ಬಂದ ಬ್ಯಾಟ್ಸ್‌ಮನ್‌ಗಳು ಹೆಚ್ಚು ಹೊತ್ತು ಆಡಲಿಲ್ಲ.