ಫುಟ್‌ಬಾಲ್‌: ಭಾರತ– ಸಿಂಗಪುರ ಪಂದ್ಯ ಡ್ರಾ
ಹೊ ಚಿ ಮಿನ್‌ ಸಿಟಿ (ಪಿಟಿಐ): ಭಾರತ ತಂಡ ಫಿಫಾ ಅಂತರರಾಷ್ಟ್ರೀಯ ಸೌಹಾರ್ದ ಫುಟ್‌ಬಾಲ್‌ ಪಂದ್ಯದಲ್ಲಿ ಸಿಂಗಪುರ ಜತೆ 1–1 ಗೋಲುಗಳ ಡ್ರಾ ಸಾಧಿಸಿತು.
ಶನಿವಾರ ನಡೆದ ಪಂದ್ಯದ 37ನೇ ನಿಮಿಷದಲ್ಲಿ ಇಖ್ಸನ್ ಫಂಡಿ ಅವರು ಸಿಂಗಪುರ ತಂಡಕ್ಕೆ ಮುನ್ನಡೆ ತಂದಿತ್ತರು. ಫ್ರೀಕಿಕ್‌ನಲ್ಲಿ ಅವರು 25 ಯಾರ್ಡ್‌ ದೂರದಿಂದ ಒದ್ದ ಚೆಂಡು ಭಾರತದ ಗೋಲ್‌ಕೀಪರ್‌ ಗುರುಪ್ರೀತ್‌ ಸಿಂಗ್‌ ಸಂಧು ಅವರನ್ನು ಕಬಳಿಸಿ ಗುರಿ ಸೇರಿತು.
ಆದರೆ ಸಿಂಗಪುರ ಆಟಗಾರರ ಸಂಭ್ರಮ ಹೆಚ್ಚುಹೊತ್ತು ಇರಲಿಲ್ಲ. ಆಶಿಕ್‌ ಕುರುನಿಯನ್‌ 43ನೇ ನಿಮಿಷದಲ್ಲಿ ಭಾರತಕ್ಕೆ ಸಮಬಲದ ಗೋಲು ತಂದಿತ್ತರು. ಸುನಿಲ್‌ ಚೆಟ್ರಿ ನೀಡಿದ ನಿಖರ ಪಾಸ್‌ನಲ್ಲಿ ಚೆಂಡನ್ನು ನಿಯಂತ್ರಣಕ್ಕೆ ಪಡೆದುಕೊಂಡ ಆಶಿಕ್‌, ಗುರಿ ಸೇರಿಸುವಲ್ಲಿ ಯಾವುದೇ ತಪ್ಪು ಮಾಡಲಿಲ್ಲ.
ಭಾರತ ತಂಡ ಫಿಫಾ ರ‍್ಯಾಂಕಿಂಗ್‌ನಲ್ಲಿ 104ನೇ ಸ್ಥಾನದಲ್ಲಿದ್ದರೆ, ಸಿಂಗಪುರ 159ನೇ ಸ್ಥಾನದಲ್ಲಿದೆ. 2012 ರಲ್ಲಿ ಇವೆರಡು ತಂಡಗಳು ಕೊನೆಯದಾಗಿ ಎದುರಾಗಿದ್ದಾಗ ಸಿಂಗಪುರ 2–0 ರಲ್ಲಿ ಗೆದ್ದಿತ್ತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.