ಗೋಲ್ಕೀಪರ್ ಕತ್ತು ಹಿಡಿದ ಆಟಗಾರ ಅಮಾನತು
ಲಾಸ್ ಏಂಜಲೀಸ್ (ಎಎಫ್‌ಪಿ): ಗೋಲ್ಕೀಪರ್ ಕತ್ತು ಹಿಡಿದ ಫುಟ್‌ಬಾಲ್ ಆಟಗಾರ ಲತಾನ್ ಇಬ್ರಹಿಮೊವಿಚ್ ಅವರನ್ನು ಎರಡು ಪಂದ್ಯಗಳಿಂದ ಅಮಾನತು ಮಾಡಲಾಗಿದೆ.
ಮೇ 11ರಂದು ನಡೆದ ಮೇಜರ್ ಲೀಗ್ ಸಾಕರ್‌ (ಎಂಎಲ್‌ಎಸ್‌) ಫುಟ್‌ಬಾಲ್ ಟೂರ್ನಿಯ ಪಂದ್ಯದಲ್ಲಿ ಲಾಸ್ ಏಂಜಲೀಸ್ ಗ್ಯಾಲಕ್ಸಿ ತಂಡದ ಪರ ಕಣಕ್ಕೆ ಇಳಿದಿದ್ದ ಇಬ್ರಹಿಮೊವಿಚ್ ನ್ಯೂಯಾರ್ಕ್‌ ಸಿಟಿ ಎಫ್‌ಸಿ ತಂಡದ ಗೋಲ್ಕೀಪರ್ ಸೀನ್ ಜಾನ್ಸನ್ ಅವರ ಕತ್ತು ಹಿಡಿದಿದ್ದರು.
ಇಬ್ರಹಿಮೊವಿಚ್ ಎದುರಾಳಿ ತಂಡದ ಗೋಲ್‌ಕೀಪರ್‌ನ ಕತ್ತು ಹಿಡಿದಿದ್ದರು. ಇದು, ನಿಯಮಾವಳಿಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ. ಆದ್ದರಿಂದ ಅವರಿಗೆ ಅಮಾನತು ಶಿಕ್ಷೆ ವಿಧಿಸಲಾಗಿದೆ ಎಂದು ಎಂಎಲ್‌ಎಸ್‌ ಶಿಸ್ತು ಸಮಿತಿ ಪ್ರಕಟಣೆಯಲ್ಲಿ ತಿಳಿಸಿದೆ.
ಪಂದ್ಯದ 86ನೇ ನಿಮಿಷದಲ್ಲಿ ಇಬ್ರಹಿಮೊವಿಚ್ ಮತ್ತು ಜಾನ್ಸನ್ ಕೈ ಕೈ ಮಿಲಾಯಿಸಿ ನೆಲದ ಮೇಲೆ ಬಿದ್ದಿದ್ದರು. ಕ್ರೀಡಾಸ್ಫೂರ್ತಿ ಮರೆತು ಈ ರೀತಿ ವರ್ತಿಸಿದ್ದಕ್ಕೆ ಇಬ್ಬರಿಗೂ ಹಳದಿ ಕಾರ್ಡ್‌ ತೋರಿಸಲಾಗಿತ್ತು. ಪಂದ್ಯದಲ್ಲಿ ಗ್ಯಾಲಕ್ಸಿ 0–2ರಿಂದ ಸೋತಿತ್ತು. ಇಬ್ರಹಿಮೊವಿಚ್ ಕಾಲು ಕೆರೆದುಕೊಂಡು ಬಂದು ಜಗಳವಾಡಿದ್ದರು ಎಂದು ಪಂದ್ಯದ ನಂತರ ಜಾನ್ಸನ್ ದೂರಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.