ಫೈನಲ್‌ ಪ್ರವೇಶಿಸಿದ ಪಿಂಕಿ

ನವದೆಹಲಿ: ಅಮೋಘ ಸಾಮರ್ಥ್ಯ ತೋರಿದ ಭಾರತದ ಪಿಂಕಿ ಜಾಂಗ್ರಾ, ಟರ್ಕಿಯ ಇಸ್ತಾನ್‌ಬುಲ್‌ನಲ್ಲಿ ನಡೆಯುತ್ತಿರುವ ಅಹಮತ್‌ ಕೋಮರ್ತ್‌ ಬಾಕ್ಸಿಂಗ್‌ ಟೂರ್ನಿಯಲ್ಲಿ ಫೈನಲ್‌ ಪ್ರವೇಶಿಸಿದ್ದಾರೆ.

ಶುಕ್ರವಾರ ನಡೆದ 51 ಕೆ.ಜಿ ವಿಭಾಗದ ಸೆಮಿಫೈನಲ್‌ನಲ್ಲಿ ಪಿಂಕಿ, ಆಸ್ಟ್ರೇಲಿಯಾದ ಟಯಲಾಹ್‌ ರಾಬರ್ಟ್‌ಸನ್‌ ಅವರನ್ನು ಮಣಿಸಿದರು.

ಇದಕ್ಕೂ ಮುನ್ನ ನಡೆದಿದ್ದ ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತದ ಬಾಕ್ಸರ್‌ 5–0ರಿಂದ ಸ್ಟೆಲುಟಾ ಡ್ಯೂಟಾ ಅವರನ್ನು ಸೋಲಿಸಿದ್ದರು.

ಸೋನಿಯಾ ಲಾಥರ್‌ (57 ಕೆ.ಜಿ), ಮೋನಿಕಾ (48 ಕೆ.ಜಿ), ಮೀನಾ ಕುಮಾರಿ (54 ಕೆ.ಜಿ), ಸಿಮ್ರನ್‌ಜಿತ್‌ ಕೌರ್‌ (64 ಕೆ.ಜಿ) ಮತ್ತು ಭಾಗ್ಯವತಿ ಕಚಾರಿ (81 ಕೆ.ಜಿ) ಅವರು ಸೆಮಿಫೈನಲ್‌ ಪ್ರವೇಶಿಸಿದರು.

ಕ್ವಾರ್ಟರ್‌ ಫೈನಲ್‌ನಲ್ಲಿ ಸೋನಿಯಾ ಅವರು ಟರ್ಕಿಯ ಬಿನಾಜ್‌ ಒಜದೆಮಿರ್‌ ವಿರುದ್ಧ ಗೆದ್ದರು. ಮೋನಿಕಾ 4–1ರಲ್ಲಿ ಬಲ್ಗೇರಿಯಾದ ಎಮಿ ಮಾರಿ ತೊದೊರೊವಾ ಮೇಲೂ, ಸಿಮ್ರನ್‌ಜಿತ್‌ 5–0ರಲ್ಲಿ ರಷ್ಯಾದ ಅಲೆಕ್ಸಾಂಡ್ರಾ ಒರ್ಡಿನಾ ವಿರುದ್ಧವೂ, ಮೀನಾ, ಟರ್ಕಿಯ ತುಗಸೆನಾಜ್‌ ಸುರ್ಮೆನೆಲಿ ಎದುರೂ, ಭಾಗ್ಯವತಿ, ಟರ್ಕಿಯ ತುಗ್ಬಾ ಒಕ್‌ ವಿರುದ್ಧವೂ ಗೆಲುವು ಒಲಿಸಿಕೊಂಡರು.