ಏಷ್ಯನ್‌ ಆರ್ಚರಿ: ಭಾರತ ಶುಭಾರಂಭ

ಕೋಲ್ಕತ್ತ (ಪಿಟಿಐ): ನಿಖರ ಗುರಿಯೊಂದಿಗೆ ಗಮನ ಸೆಳೆದ ಭಾರತದ ಬಿಲ್ಗಾರರು ಇಲ್ಲಿ ಸೋಮವಾರ ಆರಂಭಗೊಂಡ ಏಷ್ಯನ್ ಆರ್ಚರಿ ಚಾಂಪಿಯನ್‌ಷಿಪ್‌ನಲ್ಲಿ ಶುಭಾರಂಭ ಮಾಡಿದ್ದಾರೆ.

ಭಾರತದ ಆರ್ಚರಿ ಫೆಡರೇಷನ್‌ನಿಂದ ಅಮಾನತಿಗೆ ಒಳಗಾಗಿರುವ ಬಿಲ್ಗಾರರು ಭಾರತದ ಧ್ವಜದ ಅಡಿಯಲ್ಲಿ ಸ್ಪರ್ಧಿಸುತ್ತಿಲ್ಲ. ಆದರೂ ಅಮೋಘ ಸಾಮರ್ಥ್ಯ ತೋರಿದರು. ರಿಕರ್ವ್ ಮಿಶ್ರ ವಿಭಾಗದಲ್ಲಿ ಅತನು ದಾಸ್ ಮತ್ತು ದೀಪಿಕಾ ಕುಮಾರಿ ಜೋಡಿ ಚೀನಾದ ಯಿಚಾಯ್ ಜೆಂಗ್ ಮತ್ತು ಶಾಕ್ಸಾನ್ ವೀ ಅವರನ್ನು 6–2ರಲ್ಲಿ ಮಣಿಸಿ ಕಂಚು ಗಳಿಸಿದರು.

ಕಾಂಪೌಂಡ್‌ ಮಿಶ್ರ ವಿಭಾಗದಲ್ಲಿ ಅಭಿಷೇಕ್ ವರ್ಮಾ ಹಾಗೂ ಜ್ಯೋತಿ ಸುರೇಖಾ ವೆಣ್ಣಮ್‌ ಅವರು ಕೊರಿಯಾ ಜೋಡಿ ಎದುರು 159–154ರ ಗೆಲುವು ಸಾಧಿಸಿ ಫೈನಲ್‌ಗೆ ಪ್ರವೇಶಿಸಿದರು. ಪ್ರಶಸ್ತಿ ಸುತ್ತಿನ ಸ್ಪರ್ಧೆ ಬುಧವಾರ ನಡೆಯಲಿದ್ದು ಭಾರತದ ಜೋಡಿ ಚೀನಾ ತೈಪೆಯನ್ನು ಎದುರಿಸಲಿದೆ.