ಕೊಕ್ಕೊದಲ್ಲಿ ಎರಡೂ ಚಿನ್ನ ಭಾರತಕ್ಕೆ

ಕಠ್ಮಂಡು: ದಕ್ಷಿಣ ಏಷ್ಯಾ ಕ್ರೀಡಾಕೂಟದ ಕೊಕ್ಕೊದಲ್ಲಿ ಭಾರತದ ಪುರುಷ ಮತ್ತು ಮಹಿಳಾ ತಂಡದವರು ಚಿನ್ನ ಗೆದ್ದು ಸಂಭ್ರಮಿಸಿದರು. ‍ಫೈನಲ್‌ನಲ್ಲಿ ಪುರುಷರ ತಂಡ ಬಾಂಗ್ಲಾದೇಶವನ್ನೂ ಮಹಿಳೆಯರ ತಂಡ ನೇಪಾಳವನ್ನೂ ಮಣಿಸಿತು.

2016ರಲ್ಲಿ ಚಿನ್ನ ಗೆದ್ದಿದ್ದ ಭಾರತ ಪುರುಷರ ತಂಡ ಈ ಬಾರಿಯೂ ಪ್ರಾಬಲ್ಯ ಮೆರೆಯಿತು. ಫೈನಲ್‌ನಲ್ಲಿ ಇನಿಂಗ್ಸ್ ಮತ್ತು 7 ಪಾಯಿಂಟ್‌ಗಳಿಂದ ಗೆಲುವು ಸಾಧಿಸಿತು. ದೀಪಕ್ 5 ಪಾಯಿಂಟ್‌ಗಳನ್ನು ಗಳಿಸಿ ಮಿಂಚಿದರು. ನೇಪಾಳ ಮೂರನೇ ಸ್ಥಾನ ಗಳಿಸಿತು. ಮಹಿಳಾ ತಂಡ ಇನಿಂಗ್ಸ್‌ ಮತ್ತು 12 ಪಾಯಿಂಟ್‌ಗಳಿಂದ ಜಯ ಗಳಿಸಿತು. ನಾಯಕಿ ನಸ್ರೀನ್ ಮತ್ತು ಕಾಜರ್ ಭೊರ್ ಉತ್ತಮ ಆಟವಾಡಿದರು. ಬಾಂಗ್ಲಾದೇಶ ಕಂಚಿನ ಪದಕ ಗಳಿಸಿತು.