ಖೇಲೊ ಇಂಡಿಯಾ ಯೂತ್‌ ಗೇಮ್ಸ್‌ ಬ್ಯಾಸ್ಕೆಟ್‌ಬಾಲ್‌: ಕರ್ನಾಟಕ ಬಾಲಕಿಯರು ಚಾಂಪಿಯನ್‌

ಬೆಂಗಳೂರು: ನಿಧಿ ಉಮೇಶ್‌ ಮತ್ತು ಮಹೇಕ್‌ ಶರ್ಮಾ ಅವರ ಅಮೋಘ ಆಟದ ಬಲದಿಂದ ಕರ್ನಾಟಕದ ಬಾಲಕಿಯರ ಬ್ಯಾಸ್ಕೆಟ್‌ಬಾಲ್‌ ತಂಡವು ಬಿಹಾರದ ಪಟ್ನಾದಲ್ಲಿ ನಡೆದ ಖೇಲೊ ಇಂಡಿಯಾ ಯೂತ್‌ ಗೇಮ್ಸ್‌ನಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿತು.

ಗುರುವಾರ ನಡೆದ ಫೈನಲ್‌ ಹಣಾಹಣಿಯಲ್ಲಿ ಕರ್ನಾಟಕ ತಂಡವು 86–61ರಿಂದ ಹರಿಯಾಣ ತಂಡವನ್ನು ಮಣಿಸಿತು. ವಿರಾಮದ ವೇಳೆ 46–25 ಮುನ್ನಡೆ ಸಾಧಿಸಿದ್ದ ರಾಜ್ಯದ ಬಾಲಕಿಯರು ಉತ್ತರಾರ್ಧದಲ್ಲೂ ಪಾರಮ್ಯ ಮೆರೆದರು. 

ಕರ್ನಾಟಕ ನಿಧಿ ಉಮೇಶ್‌ 27, ಮಹೇಕ್‌ 21, ಮತ್ತು ನಿಧಿ ಶ್ರೀನಿವಾಸ್‌ 17 ಅಂಕ ಗಳಿಸಿದರು. ಹರಿಯಾಣ ತಂಡದ ಭೂಮಿ ಕಟಾರಿಯಾ ಮತ್ತು ಕಫಿ ಕ್ರಮವಾಗಿ 22 ಅಂಕ ಗಳಿಸಿ ಹೋರಾಟ ತೋರಿದರು.

ಕರ್ನಾಟಕ ತಂಡವು ಸೆಮಿಫೈನಲ್‌ನಲ್ಲಿ 79–65ರಿಂದ ಮಹಾರಾಷ್ಟ್ರ ತಂಡವನ್ನು ಮಣಿಸಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದಿತ್ತು.