ರಾಜ್ಯ ರ‍್ಯಾಂಕಿಂಗ್ ಟೇಬಲ್ ಟೆನಿಸ್ ಟೂರ್ನಿ: ಶಾರ್ವಿಲ್‌, ಸಾಕ್ಷ್ಯಾ ಚಾಂಪಿಯನ್‌

ಮಂಗಳೂರು: ಶಾರ್ವಿಲ್‌ ಕರಂಬೆಲ್ಕರ ಮತ್ತು ಸಾಕ್ಷ್ಯಾ ಸಂತೋಷ್ ಅವರು ಇಲ್ಲಿ ಭಾನುವಾರ ಮುಕ್ತಾಯಗೊಂಡ ರಾಜ್ಯ ರ‍್ಯಾಂಕಿಂಗ್ ಟೇಬಲ್ ಟೆನಿಸ್ ಟೂರ್ನಿಯಲ್ಲಿ ಕ್ರಮವಾಗಿ ಹೋಪ್ಸ್‌ ಬಾಲಕರ ಮತ್ತು ಬಾಲಕಿಯರ ವಿಭಾಗದಲ್ಲಿ ಪ್ರಶಸ್ತಿ ಜಯಿಸಿದರು. 

ನಗರದ ಫಾದರ್‌ ಮುಲ್ಲರ್‌ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಫೈನಲ್‌ ಪಂದ್ಯದಲ್ಲಿ ಶಾರ್ವಿಲ್‌ 3-11, 11-8, 11-4, 5-11, 14-12 ರಿಂದ ಅರ್ಣವ್‌ ಮಿಥುನ್‌ ಅವರನ್ನು ಸೋಲಿಸಿದರು. 

ಸೆಮಿಫೈನಲ್‌ನಲ್ಲಿ ಶಾರ್ವಿಲ್‌ 11-6, 11-3, 11-5 ರಿಂದ ಮುಂಕುದ್‌ ರಾವ್‌ ವಿರುದ್ಧ; ಅರ್ಣವ್‌ 11-6, 11-5, 11-7 ರಿಂದ ಪೂರಬ್ ಬಿಸ್ವಾಸ್ ವಿರುದ್ಧ ಜಯ ಸಾಧಿಸಿದ್ದರು. 

ಬಾಲಕಿಯರ ಫೈನಲ್‌ನಲ್ಲಿ ಸಾಕ್ಷ್ಯಾ 11-7, 11-7, 12-10 ರಿಂದ ನಂದನಾ ಬಂಡಿ ಅವರನ್ನು ಮಣಿಸಿದರು. ಸೆಮಿಫೈನಲ್‌ನಲ್ಲಿ ಸಾಕ್ಷ್ಯಾ 11-6, 11-6, 12-10 ರಿಂದ ತಮನ್ನಾ ನೇರ್ಲಾಜೆ ಎದುರು; ನಂದನಾ 11-4, 13-11, 11-6 ರಿಂದ ಸಾನ್ವಿ ಹರಿಪ್ರಸಾದ್ ರಾವ್ ಎದುರು ಗೆದ್ದಿದ್ದರು.

ಎನ್‌ಎಂಎಸ್‌ ವಿಭಾಗದ ಪ್ರಶಸ್ತಿ ಕೈರಾ ಬಾಳಿಗಾ ಪಾಲಾಯಿತು. ಫೈನಲ್‌ನಲ್ಲಿ ಕೈರಾ 9-11, 11-7, 3-11, 11-8, 11-4 ರಿಂದ ಸನ್ಮಾನ್ ಎಸ್. ಅವರನ್ನು ಮಣಿಸಿದರು.