ಕೊಕ್ಕೊ: ರೈಲ್ವೇಸ್‌, ಮಹಾರಾಷ್ಟ್ರಕ್ಕೆ ಪ್ರಶಸ್ತಿ

ಕಾಝಿಪೇಟ್ (ತೆಲಂಗಾಣ): ಹಾಲಿ ಚಾಂಪಿಯನ್ ರೈಲ್ವೇಸ್ ಮತ್ತು ಮಹಾರಾಷ್ಟ್ರ ತಂಡಗಳು, 58ನೇ ಸೀನಿಯರ್ ರಾಷ್ಟ್ರೀಯ ಕೊಕ್ಕೊ ಚಾಂಪಿಯನ್‌ಷಿಪ್‌ನಲ್ಲಿ ಗುರುವಾರ ಕ್ರಮವಾಗಿ ಪುರುಷರ ಮತ್ತು ಮಹಿಳೆಯರ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದುಕೊಂಡವು.

ರೈಲ್ವೇಸ್ ತಂಡವು ಸತತ ಎರಡನೇ ಬಾರಿ ಚಾಂಪಿಯನ್ ಆದರೆ, ಮಹಾರಾಷ್ಟ್ರ ವನಿತೆಯರು ನಿರಂತರ ಐದನೇ ಬಾರಿ ಕಿರೀಟ ತಮ್ಮದಾಗಿಸಿಕೊಂಡಿದ್ದಾರೆ. ರೋಚಕವಾಗಿದ್ದ ಮಹಿಳಾ ವಿಭಾಗದ ಫೈನಲ್‌ನಲ್ಲಿ ಮಹಾರಾಷ್ಟ್ರ 23–22 ರಿಂದ ಒಡಿಶಾ ತಂಡನ್ನು ಮಣಿಸಿತು.

ರೈಲ್ವೇಸ್‌ ಪುರುಷರ ವಿಭಾಗದ ಫೈನಲ್‌ನಲ್ಲಿ ಹೋರಾಟವಾಡಿ 26–21 ರಿಂದ ಮಹಾರಾಷ್ಟ್ರ ವಿರುದ್ಧ ಜಯಗಳಿಸಿತು. ಕುತೂಹಲದ ವಿಷಯವೆಂದರೆ ಒಡಿಶಾ (ಮಹಿಳಾ ವಿಭಾಗ) ಮತ್ತು ಮಹಾರಾಷ್ಟ್ರ (ಪುರುಷರ ವಿಭಾಗ) ತಂಡಗಳು ಸತತ ಎರಡನೇ ಸಲ ರನ್ನರ್ ಅಪ್ ಆಗಿವೆ.