ಮಡಿಕೇರಿ: ಮುಕ್ಕಾಟಿರ ತಂಡವು ಕೊಡವ ಕೌಟುಂಬಿಕ ಚಾಂಪಿಯನ್ಸ್ ಲೀಗ್ ಹಾಕಿ ಟೂರ್ನಿಯಲ್ಲಿ ಶುಕ್ರವಾರ ಗೆದ್ದು ಮುಂದಿನ ಸುತ್ತಿಗೆ ಪ್ರವೇಶಿಸಿತು.
ಸಮೀಪದ ಕಾಕೋಟುಪರಂಬು ಮೈದಾನದಲ್ಲಿ ಹಾಕಿ ಕೂರ್ಗ್ ಆಶ್ರಯದಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಮುಕ್ಕಾಟಿರ ತಂಡವು 5-1 ಗೋಲುಗಳಿಂದ ಚೆಪ್ಪುಡಿರ ತಂಡವನ್ನು ಸೋಲಿಸಿತು.
ಮುಕ್ಕಾಟಿರ ಪರವಾಗಿ ಕರುಂಬಯ್ಯ ಎರಡು ಗೋಲು, ಚಿರನ್, ವಸಂತ್, ಪೂಣಚ್ಚ ತಲಾ ಒಂದೊಂದು ಗೋಲು ದಾಖಲಿಸಿದರು. ಕರುಂಬಯ್ಯ ಅವರ ಅಮೋಘ ಆಟಕ್ಕೆ ಚಪ್ಪುಡಿರ ತಂಡ ಗೋಲು ಗಳಿಸಲು ಪರದಾಡಿತು.
ಮಂಡೇಪಂಡ ತಂಡವು 2-0 ಗೋಲುಗಳಿಂದ ಪಳಂಗಂಡ ತಂಡವನ್ನು ಪರಾಭಗೊಳಿಸಿತು. ಮಂಡೇಪಂಡ ಪರ ಸಜನ್, ಕವನ್ ತಲಾ ಒಂದೊಂದು ಗೋಲು ತಂದಿತ್ತರು.
ಇದೇ ಮೈದಾನದಲ್ಲಿ ನಡೆದ ‘ಚಾಂಪಿಯನ್ಸ್ ಟ್ರೋಫಿ’ ಹಾಕಿಯ ಟೂರ್ನಿಯ ನಾಕೌಟ್ ಪಂದ್ಯದಲ್ಲಿ ಸೊಮೇಯಂಡ ತಂಡವು 3-2 ಗೋಲುಗಳಿಂದ ಬೊಳ್ಳಂಡ ತಂಡವನ್ನು ಮಣಿಸಿತು.
ವಿಜೇತ ತಂಡದ ಅಪ್ಪಚ್ಚು ಎರಡು ಗೋಲು ದಾಖಲಿಸಿದರೆ, ಅಪ್ಪಯ್ಯ ಒಂದು ಗೋಲು ತಂದಿತ್ತರು. ಬೊಳ್ಳಂಡ ತಂಡದ ಪರವಾಗಿ ನಿರನ್, ಮುತ್ತಣ್ಣ ಒಂದೊಂದು ದಾಖಲಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.