ಸಿಂಗಪುರ ಓಪನ್ ಬ್ಯಾಡ್ಮಿಂಟನ್ ಟೂರ್ನಿ: ಟ್ರಿಸಾ–ಗಾಯತ್ರಿ ಜೋಡಿಗೆ ನಿರಾಸೆ

ಸಿಂಗಪುರ: ಭಾರತದ ಟ್ರಿಸಾ ಜೋಳಿ ಮತ್ತು ಗಾಯತ್ರಿ ಗೋಪಿಚಂದ್‌ ಅವರು ಶನಿವಾರ ಸಿಂಗಪುರ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳೆಯರ ಡಬಲ್ಸ್‌ನ ಸೆಮಿಫೈನಲ್‌ನಲ್ಲಿ ವಿಶ್ವದ 4ನೇ ಕ್ರಮಾಂಕದ ಜಪಾನ್‌ನ ನಮಿ ಮತ್ಸುಯಾಮಾ ಮತ್ತು ಚಿಹಾರು ಶಿಡಾ ಜೋಡಿ ಎದುರು ನೇರ್‌ ಗೇಮ್‌ಗಳಿಂದ ಸೋತರು. ಇದರೊಂದಿಗೆ ಈ ಟೂರ್ನಿಯಲ್ಲಿ ಭಾರತದ ಸವಾಲು ಕೊನೆಗೊಂಡಿತು.

ಹ್ಯಾಟ್ರಿಕ್ ಗೆಲುವಿನ ಮೇಲೆ ಕಣ್ಣಿಟ್ಟಿದ ಶ್ರೇಯಾಂಕರಹಿತ ಭಾರತದ ಜೋಡಿಗೆ ನಿರಾಸೆ ಉಂಟಾಯಿತು. 47 ನಿಮಿಷಗಳ ಸೆಣಸಾಟದಲ್ಲಿ ಜಪಾನ್ ಜೋಡಿ 23-21, 21-11 ರಲ್ಲಿ ಭಾರತ ಜೋಡಿಗೆ ಆಘಾತ ನೀಡಿತು. 

ಫೆಬ್ರವರಿಯಲ್ಲಿ ನಡೆದ ಏಷ್ಯಾ ಟೀಮ್ ಚಾಂಪಿಯನ್‌ಷಿಪ್‌ನಲ್ಲಿ ಟ್ರಿಸಾ-ಗಾಯತ್ರಿ ವಿರುದ್ಧ ಸೆಮಿಫೈನಲ್ ಸೋಲಿಗೆ ಜಪಾನ್ ಜೋಡಿ ಇಲ್ಲಿ ಮುಯ್ಯಿ ತೀರಿಸಿಕೊಂಡಿತು. ಮುಖಾಮುಖಿ ಪಂದ್ಯದಲ್ಲಿ ಭಾರತ ಜೋಡಿ ವಿರುದ್ಧ ಜಪಾನ್ 3-1 ಮುನ್ನಡೆ ಸಾಧಿಸಿದೆ.

ಕಾಮನ್‌ವೆಲ್ತ್ ಗೇಮ್ಸ್ ಕಂಚಿನ ಪದಕ ವಿಜೇತರಾದ ಟ್ರಿಸಾ ಮತ್ತು ಗಾಯತ್ರಿ ಮೊದಲ ಗೇಮ್‌ನಲ್ಲಿ 5-10 ರಿಂದ ಹಿನ್ನಡೆ ಅನುಭವಿಸಿ, ಬಳಿಕ ಚೇತರಿಸಿಕೊಂಡು 16-16 ರಲ್ಲಿ ಮುನ್ನಡೆ ಸಾಧಿಸಿದರು. ಆದರೆ, ಮತ್ಸುಯಾಮಾ ಮತ್ತು ಶಿಡಾ ಪ್ರಾಬಲ್ಯ ಮುಂದುವರಿಸಿ ಮೊದಲ ಗೇಮ್‌ ಗೆದ್ದರು. ಎರಡನೇ ಗೇಮ್‌ನಲ್ಲಿ ಜಪಾನಿಯರು 20-6 ರಿಂದ ಮುನ್ನಡೆ ಸಾಧಿಸಿ, ಎದುರಾಳಿಗೆ ಪುಟಿದೇಳಲು ಅವಕಾಶ ನೀಡಲಿಲ್ಲ.  

ಭಾರತದ ಜೋಡಿ ಪ್ರಿ ಕ್ವಾರ್ಟರ್‌ ಫೈನಲ್‌ನಲ್ಲಿ ವಿಶ್ವದ ಎರಡನೇ ಸ್ಥಾನದ ಕೊರಿಯಾದ ಬೇಕ್ ಹಾ ನಾ ಮತ್ತು ಲೀ ಸೋ ಹೀ ಹಾಗೂ ಕ್ವಾರ್ಟರ್ ಫೈನಲ್‌ನಲ್ಲಿ ಆರನೇ ಶ್ರೇಯಾಂಕದ ದಕ್ಷಿಣ ಕೊರಿಯಾದ ಕಿಮ್ ಸೋ ಯೊಂಗ್ ಮತ್ತು ಕಾಂಗ್ ಹೀ ಯಾಂಗ್‌ ಜೋಡಿಯನ್ನು ಸೋಲಿಸಿತ್ತು.