ADVERTISEMENT

ಪುರುಷರ ಹಾಕಿ ವಿಶ್ವಕಪ್‌: ಸ್ಪೇನ್‌ಗೆ ಸತತ ಎರಡನೇ ಗೆಲುವು

ಪಿಟಿಐ
Published 30 ನವೆಂಬರ್ 2025, 16:06 IST
Last Updated 30 ನವೆಂಬರ್ 2025, 16:06 IST
<div class="paragraphs"><p>ನ್ಯೂಜಿಲೆಂಡ್‌ (ಬಲ) ಮತ್ತು ಅರ್ಜೆಂಟೀನಾ ತಂಡದ ಆಟಗಾರರ ನಡುವೆ ಚೆಂಡಿಗಾಗಿ ಪೈಪೋಟಿ </p></div>

ನ್ಯೂಜಿಲೆಂಡ್‌ (ಬಲ) ಮತ್ತು ಅರ್ಜೆಂಟೀನಾ ತಂಡದ ಆಟಗಾರರ ನಡುವೆ ಚೆಂಡಿಗಾಗಿ ಪೈಪೋಟಿ

   

ಪಿಟಿಐ

ಮದುರೈ: ವಿಶ್ವ ಕ್ರಮಾಂಕದಲ್ಲಿ ನಾಲ್ಕನೇ ಸ್ಥಾನದಲ್ಲಿರುವ ಸ್ಪೇನ್‌ ತಂಡವು ಭಾನುವಾರ ಇಲ್ಲಿ ನಡೆದ ಎಫ್‌ಐಎಚ್ ಜೂನಿಯರ್ ಪುರುಷರ ಹಾಕಿ ವಿಶ್ವಕಪ್‌ನ ಡಿ ಗುಂಪಿನ ಪಂದ್ಯದಲ್ಲಿ 2–0 ಗೋಲುಗಳಿಂದ ಬೆಲ್ಜಿಯಂ ತಂಡವನ್ನು ಸೋಲಿಸಿತು. ಸತತ ಎರಡನೇ ಗೆಲುವು ದಾಖಲಿಸಿದ ಸ್ಪೇನ್‌, ಕ್ವಾರ್ಟರ್ ಫೈನಲ್ ಸ್ಥಾನಕ್ಕಾಗಿ ತನ್ನ ಹಾದಿಯನ್ನು ಸುಗಮಗೊಳಿಸಿತು.

ADVERTISEMENT

ಜುವಾನ್ ಪ್ರಾಡೊ (20ನೇ ನಿಮಿಷ) ಮತ್ತು ಬ್ರೂನೊ ಅವಿಲಾ (32ನೇ ನಿಮಿಷ) ಅವರು ಸ್ಪೇನ್‌ ಪರ ಗೋಲು ಗಳಿಸಿದರು. ಇದಕ್ಕೂ ಮುನ್ನ ಸ್ಪೇನ್‌ 8–0ಯಿಂದ ಈಜಿಪ್ಟ್‌ ತಂಡವನ್ನು ಮಣಿಸಿ ಅಭಿಯಾನ ಆರಂಭಿಸಿತ್ತು.

ಸ್ಪೇನ್ ತಂಡವು ಎರಡು ಪಂದ್ಯಗಳಿಂದ ಆರು ಅಂಕಗಳೊಂದಿಗೆ ಗುಂಪಿನಲ್ಲಿ ಅಗ್ರಸ್ಥಾನದಲ್ಲಿದೆ. ಏಳನೇ ಕ್ರಮಾಂಕದ ಬೆಲ್ಜಿಯಂ ತಂಡವು ಎರಡು ಪಂದ್ಯಗಳಿಂದ ಮೂರು ಅಂಕಗಳನ್ನು ಹೊಂದಿದೆ. ಸ್ಪೇನ್ ತಂಡವು ಮಂಗಳವಾರ ನಮೀಬಿಯಾ ವಿರುದ್ಧ ಆಡಲಿದ್ದು, ಅದೇ ದಿನ ಬೆಲ್ಜಿಯಂ ತಂಡವು ಈಜಿಪ್ಟ್ ವಿರುದ್ಧ ಸೆಣಸಲಿದೆ.

ಇದೇ ಗುಂಪಿನ ಮತ್ತೊಂದು ಪಂದ್ಯದಲ್ಲಿ ನಮೀಬಿಯಾ ತಂಡವು 4–2ರಿಂದ ಈಜಿಪ್ಟ್‌ ತಂಡವನ್ನು ಮಣಿಸಿತು. ನಮೀಬಿಯಾ ಪರ ಲಿಯಾಮ್ ಬ್ರೂಯ್ಸ್ (23ನೇ), ಜೇಮ್ಸ್ ಡಿ ಜಾಗರ್ (26ನೇ), ಜೋಶ್ ವ್ಯಾನ್ ಮೆರ್ವೆ (32ನೇ) ಮತ್ತು ಜಾನ್ ಪೌಲ್ ಬ್ರಿಟ್ಜ್ (60ನೇ) ಗೋಲು ಗಳಿಸಿದರು. ಈಜಿಪ್ಟ್ ಪರ ಅಬ್ದುಲ್‌ರಹಮಾನ್ ಕಾಸೆಮ್ (28ನೇ ) ಮತ್ತು ಮೊಹಬ್ ಹೆಗಾಬ್ (53ನೇ) ಚೆಂಡನ್ನು ಗುರಿ ಸೇರಿಸಿದರು.

ಇತರ ಪಂದ್ಯಗಳಲ್ಲಿ ವಿಶ್ವದ ಐದನೇ ಕ್ರಮಾಂಕದ ನೆದರ್ಲೆಂಡ್ಸ್‌ ತಂಡವು 6–1ರಿಂದ ಮಲೇಷ್ಯಾವನ್ನು ಸೋಲಿಸಿ ಇ ಗುಂಪಿನಲ್ಲಿ  ಅಗ್ರಸ್ಥಾನಕ್ಕೇರಿತು. ಅಷ್ಟೇ ಪಂದ್ಯಗಳಲ್ಲಿ ಎರಡು ಗೆಲುವು ದಾಖಲಿಸಿದ ಇಂಗ್ಲೆಂಡ್ ಎರಡನೇ ಸ್ಥಾನದಲ್ಲಿದೆ. ಇಂಗ್ಲೆಂಡ್‌ ತಂಡವು 13-0ರಿಂದ ಆಸ್ಟ್ರಿಯಾವನ್ನು ಮಣಿಸಿತು.

ಮಂಗಳವಾರ ಮಧುರೈನಲ್ಲಿ ನಡೆಯಲಿರುವ ತನ್ನ ಕೊನೆಯ ಗುಂಪು ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವು ಮಲೇಷ್ಯಾ ವಿರುದ್ಧ; ನೆದರ್ಲೆಂಡ್ಸ್‌ ತಂಡವು ಆಸ್ಟ್ರಿಯಾ ವಿರುದ್ಧ ಆಡಲಿದೆ. 

ಚೆನ್ನೈನ ಮೇಯರ್ ರಾಧಾಕೃಷ್ಣನ್ ಹಾಕಿ ಕ್ರೀಡಾಂಗಣದಲ್ಲಿ ನಡೆದ ಸಿ ಗುಂಪಿನ ಪಂದ್ಯದಲ್ಲಿ ನ್ಯೂಜಿಲೆಂಡ್‌ ತಂಡವು 3–3 ಗೋಲುಗಳಿಂದ ಅರ್ಜೆಂಟೀನಾ ತಂಡದೊಂದಿಗೆ ಡ್ರಾ ಸಾಧಿಸಿತು. ಇದೇ ಗುಂಪಿನ ಮತ್ತೊಂದು ಪಂದ್ಯದಲ್ಲಿ ಜಪಾನ್‌ 3–2ರಿಂದ ಚೀನಾ ತಂಡವನ್ನು ಮಣಿಸಿತು. ಎಫ್‌ ಗುಂಪಿನ ಪಂದ್ಯದಲ್ಲಿ ದಕ್ಷಿಣ ಕೊರಿಯಾ ತಂಡವು 3–3ರಿಂದ ಬಾಂಗ್ಲಾದೇಶ ವಿರುದ್ಧ ಡ್ರಾ ಮಾಡಿಕೊಂಡಿತು.

ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.