ಬ್ಯಾಸ್ಕೆಟ್‌ಬಾಲ್‌: ಫೈನಲ್‌ಗೆ ಯಂಗ್‌ ಓರಿಯನ್ಸ್‌

ಬೆಂಗಳೂರು: ರಾಜ್ಯ ಅಸೋಸಿಯೇಷನ್‌ ಕಪ್‌ ಬ್ಯಾಸ್ಕೆಟ್‌ಬಾಲ್ ಚಾಂಪಿಯನ್‌ಷಿಪ್‌ನ ಫೈನಲ್‌ ಲೀಗ್‌ ಪಂದ್ಯಗಳು ಶನಿವಾರ ನಡೆಯಲಿದ್ದು, ಪುರುಷರ ವಿಭಾಗದಲ್ಲಿ ಯಂಗ್‌ ಓರಿಯನ್ಸ್‌ ಬಿ.ಸಿ ಹಾಗೂ ಡಿವೈಇಎಸ್‌ ಬೆಂಗಳೂರು ತಂಡಗಳು ಪ್ರಶಸ್ತಿಗಾಗಿ ಸೆಣಸಲಿವೆ.

ಕಂಠೀರವ ಒಳಾಂಗಣ ಕ್ರೀಡಾಂಗಣದ ಬ್ಯಾಸ್ಕೆಟ್‌ಬಾಲ್‌ ಕೋರ್ಟ್‌ನಲ್ಲಿ ಪಂದ್ಯಗಳು ನಡೆಯಲಿವೆ. ಮಹಿಳೆಯರ ವಿಭಾಗದಲ್ಲಿ ನೈಋತ್ಯ ರೈಲ್ವೆ ಮತ್ತು ಬೀಗಲ್ಸ್‌ ಬ್ಯಾಸ್ಕೆಟ್‌ಬಾಲ್‌ ಕ್ಲಬ್‌ ತಂಡಗಳು ಪೈಪೋಟಿ ನಡೆಸಲಿವೆ.

ಶುಕ್ರವಾರ ನಡೆದ ಪುರುಷರ ವಿಭಾಗದ ಸೆಮಿಫೈನಲ್‌ ಲೀಗ್‌ ಪಂದ್ಯಗಳಲ್ಲಿ ಡಿವೈಇಎಸ್‌ ಬೆಂಗಳೂರು ತಂಡವು 82–81ರಿಂದ ಬ್ಯಾಂಕ್‌ ಆಫ್‌ ಬರೋಡಾ ವಿರುದ್ಧ; ಯಂಗ್‌ ಓರಿಯನ್ಸ್‌ ಸ್ಪೋರ್ಟ್ಸ್‌ ಕ್ಲಬ್‌ ತಂಡವು 72–53ರಿಂದ ಸದರ್ನ್‌ ಬ್ಲ್ಯೂಸ್‌ ವಿರುದ್ಧ; ಯಂಗ್‌ ಓರಿಯನ್ಸ್‌ ತಂಡವು 88–86ರಿಂದ ಬ್ಯಾಂಕ್‌ ಆಫ್‌ ಬರೋಡಾ ವಿರುದ್ಧ; ಸದರ್ನ್‌ ಬ್ಲ್ಯೂಸ್‌ ತಂಡವು 68–60ರಿಂದ ಡಿವೈಇಎಸ್‌ ಬೆಂಗಳೂರು ವಿರುದ್ಧ ಜಯ ಸಾಧಿಸಿದವು.

ಮಹಿಳೆಯರ ವಿಭಾಗದ ಸೆಮಿಫೈನಲ್‌ ಲೀಗ್‌ ಪಂದ್ಯಗಳಲ್ಲಿ ಬೀಗಲ್ಸ್‌ ಬಿ.ಸಿ ತಂಡವು 59–42ರಿಂದ ರಾಜಮಹಲ್‌ ಬಿ.ಸಿ. ವಿರುದ್ಧ; ನೈಋತ್ಯ ರೈಲ್ವೆ ತಂಡವು 62–30ರಿಂದ ಮೌಂಟ್ಸ್‌ ಕ್ಲಬ್‌ ವಿರುದ್ಧ ಹಾಗೂ ಮೌಂಟ್ಸ್‌ ಕ್ಲಬ್‌ ತಂಡವು 68–61ರಿಂದ ರಾಜಮಹಲ್‌ ತಂಡದ ವಿರುದ್ಧ ಗೆಲುವು ಸಾಧಿಸಿದವು.