ಪ್ರೊಕಬಡ್ಡಿ: ಪುಣೇರಿ, ಮುಂಬಾಗೆ ಜಯಭೇರಿ

ಹೈದರಾಬಾದ್: ಪಂಕಜ್ ಮೋಹಿತೆ ಮತ್ತು ಅಸ್ಲಂ ಇನಾಮದಾರ್ ಅವರ ಮಿಂಚಿನ ಆಟದಿಂದಾಗಿ ಪುಣೇರಿ ಪಲ್ಟನ್ ತಂಡವು ಪ್ರೊ ಕಬಡ್ಡಿ ಪಂದ್ಯದಲ್ಲಿ ಜಯಿಸಿತು.

ಶನಿವಾರ ಇಲ್ಲಿ ನಡೆದ ಪಂದ್ಯದಲ್ಲಿ ಪುಣೇರಿ ತಂಡವು 38–25ರಿಂದ ತೆಲುಗು ಟೈಟನ್ಸ್‌ ವಿರುದ್ಧ ಜಯಿಸಿತು.

ಪುಣೇರಿ ತಂಡದ ರೇಡರ್‌ಗಳಾದ ಪಂಕಜ್ ಹಾಗೂ ಅಸ್ಲಂ ತಲಾ ಎಂಟು ಅಂಕಗಳನ್ನು ಗಳಿಸಿದರು. ಅವರೊಂದಿಗೆ ಆಕಾಶ್ ಶಿಂಧೆ (5) ಕೂಡ ಮಿಂಚಿದರು. ಇದರಿಂದಾಗಿ ತಂಡವು ಪಾರಮ್ಯ ಮೆರೆಯಿತು. ಮೊದಲಾರ್ಧದಲ್ಲಿ ಪುಣೇರಿ ತಂಡವು 14–10ರಿಂದ ಮುನ್ನಡೆ ಸಾಧಿಸಿತ್ತು. ನಂತರದ ಅವಧಿಯಲ್ಲಿ ಮತ್ತಷ್ಟು ವೇಗವಾಗಿ ಅಂಕಗಳನ್ನು ಗಳಿಸಿತು.

ಮುಂಬಾಗೆ ಜಯ: ಇನ್ನೊಂದು ಪಂದ್ಯದಲ್ಲಿ ಗುಮಾನ್ ಸಿಂಗ್ ಮತ್ತು ಆಶಿಶ್ ಅವರ ಅಮೋಘ ಆಟದ ಬಲದಿಂದ ಯು ಮುಂಬಾ ತಂಡವು 49–41ರಿಂದ ಬೆಂಗಾಲ್ ವಾರಿಯರ್ಸ್ ವಿರುದ್ಧ ಗೆದ್ದಿತು.

ಮುಂಬಾ ತಂಡದ ಗುಮಾನ್ ಸಿಂಗ್ (14) ಹಾಗೂ ಆಶಿಶ್ (13) ಮಿಂಚಿದರು. ಬೆಂಗಾಲ್ ತಂಡದ ಮಣಿಂದರ್ ಸಿಂಗ್ (13 ) ಉತ್ತಮವಾಗಿ ಆಡಿದರು.