ವಿಶ್ವ ಕುಸ್ತಿ: ಹಾಲಿ ಚಾಂಪಿಯನ್ ಮಣಿಸಿ ಸೆಮಿಫೈನಲ್‌ಗೆ ಭಾರತದ ಸರಿತಾ ಮೋರ್
ವಿಶ್ವ ಕುಸ್ತಿ ಚಾಂಪಿಯನ್‌ಷಿಪ್‌: ನಾಲ್ಕರ ಘಟ್ಟಕ್ಕೆ ಅನ್ಶು
ಓಸ್ಲೊ, ನಾರ್ವೆ: ಭಾರತದ ಸರಿತಾ ಮೋರ್ ಅವರು ಹಾಲಿ ಚಾಂಪಿಯನ್ ಲಿಂಡಾ ಮೊರಾಯಿಸ್ ಅವರನ್ನು ಚಿತ್‌ ಮಾಡಿ ವಿಶ್ವ ಕುಸ್ತಿ ಚಾಂಪಿಯನ್‌ಷಿಪ್‌ನಲ್ಲಿ ಸೆಮಿಫೈನಲ್‌ಗೆ ಲಗ್ಗೆಹಾಕಿದ್ದಾರೆ. ಅನ್ಶು ಮಲಿಕ್ ಕೂಡ ಬುಧವಾರ ನಾಲ್ಕರ ಘಟ್ಟ ತಲುಪಿದ್ದು ಪದಕದ ಭರವಸೆ ಮೂಡಿಸಿದ್ದಾರೆ.
59 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿರುವ ಏಷ್ಯನ್ ಚಾಂಪಿಯನ್ ಸರಿತಾ ಅವರಿಗೆ ಮೊದಲ ಸುತ್ತಿನಲ್ಲಿ ಕೆನಡಾದ, 2019ರ ವಿಶ್ವ ಚಾಂಪಿಯನ್ ಲಿಂಡಾ ಸವಾಲು ಎದುರಾಯಿತು. ಪ್ರೀಕ್ವಾರ್ಟರ್‌ಫೈನಲ್ ಹಂತದ ಈ ಹಣಾಹಣಿಯಲ್ಲಿ ಸರಿತಾ 8–2ರಿಂದ ಲಿಂಡಾ ಅವರಿಗೆ ಸೋಲುಣಿಸಿದರು.
ಕೆನಡಾ ಕುಸ್ತಿಪಟು ಎದುರಿನ ಸೆಣಸಾಟದಲ್ಲಿ ಸರಿತಾ ಸಂಪೂರ್ಣ ಪಾರಮ್ಯ ಮೆರೆದರು. ಮೊದಲಾರ್ಧದಲ್ಲೇ 7–0ಯಿಂದ ಮುನ್ನಡೆದರು. ಚುರುಕಿನ ನಡೆಗಳು ಹಾಗೂ ಉತ್ತಮ ಡಿಫೆನ್ಸ್ ಮೂಲಕ ಎದುರಾಳಿಯನ್ನು ‘ಲಾಕ್‘ ಮಾಡಿದರು. ದ್ವಿತೀಯಾರ್ಧದಲ್ಲಿ ಲಿಂಡಾ ಅವರಿಗೆ ಕೇವಲ ಒಂದು ಪಾಯಿಂಟ್ ಬಿಟ್ಟುಕೊಟ್ಟರು.
ಜಿದ್ದಾಜಿದ್ದಿಯಿಂದ ಕೂಡಿದ್ದ ಕ್ವಾರ್ಟರ್‌ಫೈನಲ್‌ನ ಸೆಣಸಾಟದಲ್ಲಿ ಸರಿತಾ ಅವರು 3-1ರಿಂದ ಜರ್ಮನಿಯ ಸ್ಯಾಂಡ್ರಾ ಪರುಸೆವಸ್ಕಿ ಅವರನ್ನು ಮಣಿಸಿದರು. ಮುಂದಿನ ಬೌಟ್‌ನಲ್ಲಿ ಅವರಿಗೆ ಬಲ್ಗೇರಿಯಾದ ಬಿಲಿಯಾನ ಜಿವೊಕಾ ದುದೊಯಾ ಸವಾಲು ಎದುರಾಗಿದೆ.
57 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ್ದ ಅನ್ಶು ಮಲಿಕ್ ಕೂಡ ನಿರಾಸೆ ಮಾಡಲಿಲ್ಲ. ಮೊದಲ ಸುತ್ತಿನಲ್ಲಿ ಕಜಕಸ್ತಾನದ ನೀಲುಫರ್‌ ರೈಮೊವಾ ಎದುರು ಗೆದ್ದ ಅವರು ಕ್ವಾರ್ಟರ್‌ಫೈನಲ್‌ನಲ್ಲಿ 5–1ರಿಂದ ಮಂಗೋಲಿಯಾದ ದವಾಚಿಮೆಗ್‌ ಎರ್ಕೆಂಬಯರ್ ಅವರಿಗೆ ಸೋಲಿನ ರುಚಿ ತೋರಿಸಿದರು.
72 ಕೆಜಿ ವಿಭಾಗದಲ್ಲಿ ದಿವ್ಯಾ ಕಾಕ್ರನ್‌ ಅವರು ಪ್ರೀಕ್ವಾರ್ಟರ್‌ಫೈನಲ್‌ನಲ್ಲಿ ಜಪಾನ್‌ನ ಮಾಸಕೊ ಫುರುಯಿಚ್ ಎದುರು ಮಣಿದರು. ಕಿರನ್‌ (76 ಕೆಜಿ) ಅವರು ರಿಪೇಜ್ ಸುತ್ತಿನಲ್ಲಿ ಗೆದ್ದು ಕಂಚಿನ ಪದಕದ ಬೌಟ್‌ಗೆ ಕಾಲಿಟ್ಟಿದ್ದಾರೆ. ಪೂಜಾ ಜಾಟ್‌ (53 ಕೆಜಿ) ಮತ್ತು ರಿತು ಮಲಿಕ್ (68 ಕೆಜಿ) ನಿರಾಸೆ ಅನುಭವಿಸಿದರು.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.