ಗಾಳಿಯಲಿ ತೇಲಿ ಹೋದ
ಗಾಳಿಯಲಿ ತೇಲಿ ಹೋದ
ಅದೆಷ್ಟು ಮಾತು ಕಣ್ಣಿಗೆ ಕಾಣಿಸದೆ
ಹೋಗಿವೆ...
ಬೆಳಕಿನಲಿ ಬೆರೆತು ಹೋದ
ಅದೆಷ್ಟು ನಗು ಕಣ್ಣಿಗೆ ಕಾಣಿಸದೆ
ಹೋಗಿವೆ...
ನೀರಿನಲಿ ಮುಳುಗಿ ಹೋದ
ಅದೆಷ್ಟು ಅಳು ಕಣ್ಣಿಗೆ ಕಾಣಿಸದೆ
ಹೋಗಿವೆ...
ಅವಾವೂ ಕಾಣಿಸದೆ ಹೋಗಬೇಕಾದ್ದೆ.
ಇಲ್ಲದಿದ್ದರೆ ಮನುಷ್ಯ ಹೇಗೆ
ಹೊಸದು ಆದಾನು?
***
ಮರೆಯಲ್ಲಿದೆ ನವಿಲು
ಮರೆಯಲ್ಲಿದೆ ನವಿಲು
ಬೆಳಗಿನ ಬಿಸಿಲನು ಮೇಯುತಿದೆ.
ಹಾವಿನ ಪೊರೆ ತುಳಿಯುತಿದೆ.
ಅಪನಂಬಿಕೆಯಲೆ ಬೇಯುವ ಮನದಿ
ಯಾವುದೂ ಬೇಯುವುದು:
ಪೊರೆ, ಬಿಸಿಲು, ನವಿಲು...
ಉಳಿವ ಹಲ್ಲಲಿ ಕಡೆಯ ಊಟದ ಸ್ವಾದ
ಬಣ್ಣನೆಯ
ಕೇಳುವವರಾರು?
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.