ಕಳ್ಳರಿಗೆ ಪೊಲೀಸರ ಗುಂಡೇಟು

ಬೆಂಗಳೂರು: ಎಚ್‌ಎಂಟಿ ಲೇಔಟ್‌ನ ಮನೆ­ಯೊಂದರಲ್ಲಿ ಮಂಗಳವಾರ ಕಳವು ಮಾಡುವ ಯತ್ನದಲ್ಲಿದ್ದ ಕಳ್ಳರ ಮೇಲೆ ವಿದ್ಯಾರಣ್ಯಪುರ ಠಾಣೆ ಇನ್‌ಸ್ಪೆಕ್ಟರ್‌ ಪುನೀತ್‌ಕುಮಾರ್‌ ಅವರು ಸರ್ವಿಸ್‌ ಪಿಸ್ತೂಲ್‌ನಿಂದ ಗುಂಡು ಹಾರಿಸಿ ಬಂಧಿಸಿದ್ದಾರೆ.

ಎಚ್‌ಎಂಟಿ ಲೇಔಟ್‌ ಒಂದನೇ ಬ್ಲಾಕ್‌ನ ಸಪ್ತಗಿರಿ ಲೇಔಟ್‌ ರಸ್ತೆ ನಿವಾಸಿ ಮುರಳಿ ಮನೋಹರ್‌ ಎಂಬು­ವರ ಮನೆಗೆ ಬೆಳಗಿನ ಜಾವ 4 ಗಂಟೆ ಸುಮಾರಿಗೆ ಇಬ್ಬರು ಕಳ್ಳರು ನುಗ್ಗಿದ್ದರು.

ಈ ವೇಳೆ ವಿದ್ಯಾರಣ್ಯಪುರ ಠಾಣೆಯ ಹೆಡ್‌ ಕಾನ್‌ಸ್ಟೆಬಲ್‌ ನಾಗಭೂಷಣ್‌ ಮತ್ತು ಗೃಹರಕ್ಷಕ ದಳ ಸಿಬ್ಬಂದಿ ಮುನಿ­ಯಪ್ಪ ಅವರು ಗಸ್ತು ತಿರುಗುತ್ತಾ ಅದೇ ರಸ್ತೆಗೆ ಹೋಗಿದ್ದಾರೆ. ಆಗ ಮುರಳಿ ಅವರ ಮನೆಯ ಮುಂದೆ ನಾಯಿಗಳು ಬೊಗಳುತ್ತಿದ್ದುದು ಗೊತ್ತಾಗಿದೆ. ಇದ­ರಿಂದ ಅನುಮಾನಗೊಂಡ ನಾಗ­ಭೂಷಣ್‌ ಹಾಗೂ ಮುನಿಯಪ್ಪ, ಮನೆಯ ಬಳಿ ಹೋಗಿ ಪರಿಶೀಲಿಸಿದಾಗ ಒಳಗೆ ಪಾತ್ರೆಗಳು ಬಿದ್ದಂತೆ ಶಬ್ದ ಕೇಳಿ­ಸಿದೆ. ಜತೆಗೆ ವಿದ್ಯುತ್‌ ದೀಪ ಉರಿ­ಯು­ತ್ತಿ­ರುವುದು ಗೊತ್ತಾಗಿದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ನಂತರ ನಾಗಭೂಷಣ್‌, ಮನೆಯ ಬಾಗಿಲು ತೆರೆಯುವಂತೆ ಕೂಗಿದ್ದಾರೆ. ಆದರೆ, ಮನೆಯೊಳಗಿದ್ದ ವ್ಯಕ್ತಿಗಳು ಪ್ರತಿಕ್ರಿಯಿಸಿಲ್ಲ. ಇದರಿಂದಾಗಿ ಅವರು ವಾಕಿಟಾಕಿ ಮೂಲಕ ಠಾಣೆಗೆ ಮಾಹಿತಿ ಕೊಟ್ಟು ಹೆಚ್ಚಿನ ಸಿಬ್ಬಂದಿಯನ್ನು ಸ್ಥಳಕ್ಕೆ ಕರೆಸಿಕೊಂಡು ಕಟ್ಟಡವನ್ನು ಸುತ್ತುವರಿ­ದಿದ್ದಾರೆ. ಬಳಿಕ ಇನ್‌ಸ್ಪೆಕ್ಟರ್‌ ಪುನೀತ್‌­ಕುಮಾರ್‌ ಅವರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ ಎಂದು ಅಧಿಕಾರಿ­ಗಳು ಹೇಳಿದ್ದಾರೆ.

ಸ್ವಲ್ಪ ಸಮಯದಲ್ಲೇ ಮನೆಯ ಬಳಿ ಹೋದ ಪುನೀತ್‌ಕುಮಾರ್‌, ಒಳಗಿದ್ದ ವ್ಯಕ್ತಿ­ಗಳಿಗೆ ಹೊರ ಬರುವಂತೆ ಸೂಚಿಸಿ­ದ್ದಾರೆ. ಆಗ ಆ ವ್ಯಕ್ತಿಗಳು ಒಳಗಿ­ನಿಂ­ದಲೇ ಕಿಟಕಿ ಗಾಜು ಒಡೆದು, ಕೂಗಾ­ಡಿ­ದ್ದಾರೆ. ನಂತರ ಬಾಗಿಲು ತೆರೆದು, ಪಕ್ಕ­ದಲ್ಲೇ ನಿಂತಿದ್ದ ನಾಗ­ಭೂಷಣ್‌ ಅವರ ತಲೆಗೆ ಕಬ್ಬಿಣದ ಸಲಾಕೆಯಿಂದ ಹೊಡೆದು ಪುನಃ ಮನೆಯೊಳಗೆ ಸೇರಿ­ಕೊಂಡಿ­ದ್ದಾರೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಆ ನಂತರ ಪುನೀತ್‌ಕುಮಾರ್‌, ನಡು­ಮನೆಯ ಕಿಟಕಿ ಬಳಿ ಹೋಗಿ ಹೊರಗಿ­ನಿಂದಲೇ ಕಳ್ಳರ ಮೇಲೆ ಮೂರು ಸುತ್ತು ಗುಂಡು ಹಾರಿಸಿದ್ದಾರೆ. ಅದರಲ್ಲಿ ಒಂದು ಗುಂಡು ಆರೋಪಿ ಆದಿಲ್‌ ಹೀರಾನ ಬಲಗಾಲಿಗೆ ಹಾಗೂ ಮತ್ತೊಂದು ಗುಂಡು ಇನ್ನೊಬ್ಬ ಆರೋಪಿ ಮಿಥುನ್‌ನ ಎಡಗಾಲಿಗೆ ಹೊಕ್ಕಿದೆ. ಇದರಿಂದ ಆರೋಪಿಗ­ಳಿ­ಬ್ಬರೂ  ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾರೆ. ಬಳಿಕ ಸಿಬ್ಬಂದಿ ಮನೆಯೊಳಗೆ ಹೋಗಿ ಆರೋಪಿಗಳನ್ನು ಬಂಧಿಸಿ, ವಿಕ್ಟೋ­ರಿಯಾ ಆಸ್ಪತ್ರೆಗೆ ದಾಖಲಿ­ಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಘಟನಾ ಸಂದರ್ಭದಲ್ಲಿ ಮುರಳಿ ಹಾಗೂ ಅವರ ಕುಟುಂಬ ಸದಸ್ಯರು ಮನೆಯಲ್ಲಿ ಇರಲಿಲ್ಲ. ಅವರು ನಾಲ್ಕೈದು ದಿನಗಳ ಹಿಂದೆ ಮನೆಗೆ ಬೀಗ ಹಾಕಿಕೊಂಡು ಆಂಧ್ರಪ್ರದೇಶಕ್ಕೆ ಹೋಗಿ­ದ್ದರು. ಆಂಧ್ರಪ್ರದೇಶ ಮೂಲದ ಮುರಳಿ ಅವರು ನಿವೃತ್ತ ಸೂಪರಿಂಟೆಂಡೆಂಟ್‌ ಎಂಜಿನಿಯರ್‌.

ಗಾಯಾಳು ನಾಗಭೂಷಣ್‌, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆರೋಪಿಗಳಿಗೆ ಹೊಕ್ಕಿದ್ದ ಗುಂಡುಗಳನ್ನು ಶಸ್ತ್ರಚಿಕಿತ್ಸೆ ಮೂಲಕ ಹೊರ ತೆಗೆ­ಯಲಾಗಿದೆ. ಬಂಧಿತರ ವಿರುದ್ಧ ಕಳವು ಯತ್ನ, ಪೊಲೀಸರ ಕರ್ತವ್ಯ ನಿರ್ವಹಣೆಗೆ ಅಡ್ಡಿಪಡಿಸಿದ ಮತ್ತು ಹಲ್ಲೆ
ಆರೋಪ­ದಡಿ ಪ್ರಕರಣ ದಾಖಲಿಸಲಾಗಿದೆ.

ಪೂರ್ವಾಪರ ಪರಿಶೀಲನೆ
ಸಿಬ್ಬಂದಿ ಮನೆಯ ಬಳಿ ಹೋಗುವಷ್ಟರಲ್ಲಿ ಆರೋಪಿಗಳು ಅಲ್ಮೇರಾದಲ್ಲಿದ್ದ ಸುಮಾರು 4 ಕೆ.ಜಿಯಷ್ಟು ಬೆಳ್ಳಿ ವಸ್ತುಗಳನ್ನು ಬ್ಯಾಗ್‌ಗೆ ತುಂಬಿಕೊಂಡಿದ್ದರು. ಪಶ್ಚಿಮಬಂಗಾಳ ಮೂಲದ ಅವರು ಕಳವು ಮಾಡುವ ಉದ್ದೇಶಕ್ಕಾಗಿಯೇ ಇತ್ತೀಚೆಗೆ ನಗರಕ್ಕೆ ಬಂದಿದ್ದರು. ಆರೋಪಿಗಳ ಪೂರ್ವಾಪರದ ಬಗ್ಗೆ ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ.

–ಅಲೋಕ್‌ಕುಮಾರ್‌, ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ಹೆಚ್ಚುವರಿ ಪೊಲೀಸ್‌ ಕಮಿಷನರ್‌