ಸಿಸಿಬಿ ಕಾರ್ಯಾಚರಣೆ: ಕೋಟ್ಪಾ ಕಾಯ್ದೆಯಡಿ ₹21.14 ಲಕ್ಷ ದಂಡ 

ಬೆಂಗಳೂರು: ನಗರದ ಶಾಲಾ–ಕಾಲೇಜು ಆವರಣ ಸುತ್ತಲೂ ತಂಬಾಕು ಉತ್ಪನ್ನ ಮಾರಾಟ ಮಾಡುತ್ತಿದ್ದ ಅಂಗಡಿಗಳ ಮೇಲೆ ದಾಳಿ ನಡೆಸಿದ್ದ ಸಿಸಿಬಿ ಪೊಲೀಸರು, ಪ್ರಸಕ್ತ ವರ್ಷ ಮೇ ಅಂತ್ಯದವರೆಗೆ ₹21.14 ಲಕ್ಷ ದಂಡ ಸಂಗ್ರಹಿಸಿದ್ದಾರೆ.

‘ಅಶೋಕನಗರ, ವಿಲ್ಸನ್‌ ಗಾರ್ಡನ್‌, ವಿವೇಕನಗರ, ಇಂದಿರಾನಗರ, ಪುಲಿಗೇಶಿನಗರ, ಜಯನಗರ, ಬಸವನಗುಡಿ, ಬಸವೇಶ್ವರನಗರ, ರಾಜಾಜಿನಗರ, ಕಲಾಸಿಪಾಳ್ಯ ಠಾಣೆ ವ್ಯಾಪ್ತಿಯಲ್ಲಿ 12,594 ಅಂಗಡಿಗಳ ವಿರುದ್ಧ ತಂಬಾಕು ಉತ್ಪನ್ನಗಳ ನಿಷೇಧ ಕಾಯ್ದೆ (ಕೋಟ್ಪಾ) ಅಡಿ ಪ್ರಕರಣ ದಾಖಲಿಸಿದ್ದೇವೆ. 25 ಮಂದಿಯನ್ನು ಬಂಧಿಸಿದ್ದೇವೆ’ ಎಂದು ಸಿಸಿಬಿ  ಅಧಿಕಾರಿ ತಿಳಿಸಿದ್ದಾರೆ.

‘2016ರಲ್ಲಿ 12,226 ಪ್ರಕರಣಗಳನ್ನು ದಾಖಲಿಸಿಕೊಂಡು ₹22.64 ಲಕ್ಷ ದಂಡ ಸಂಗ್ರಹಿಸಿದ್ದೆವು. ಸೋಮವಾರ (ಜೂ. 19) ಒಂದೇ ದಿನದಲ್ಲಿ 29 ಅಂಗಡಿಗಳ ಪರಿಶೀಲನೆ ಮಾಡಿದ್ದೇವೆ.  47 ಪ್ರಕರಣಗಳನ್ನು ದಾಖಲಿಸಿ ಇಬ್ಬರನ್ನು ಬಂಧಿಸಿದ್ದೇವೆ’ ಎಂದರು.