ಕುಂದಗೋಳದಲ್ಲಿ ಪಥ ಸಂಚಲನ

ಕುಂದಗೋಳ:  ತಾಲ್ಲೂಕಿನ ಅತಿ ಸೂಕ್ಷ್ಮ ಗ್ರಾಮಗಳಾಗಿರುವ ಕಳಸ, ಗುಡಗೇರಿ, ಸಂಶಿ, ಕುಂದಗೋಳ, ಕಮಡೊಳ್ಳಿ ಗ್ರಾಮಗಳಲ್ಲಿ ಸಿಕಂದರಾಬಾದ್‌ ಜಾಕೋಬ್ ಬೆಟಾಲಿಯನ್ ತಂಡ ಬುಧವಾರ ಪಥ ಸಂಚಲನ ನಡೆಸಿತು.

ಈ ಸಂದರ್ಭದಲ್ಲಿ ಮಾತನಾಡಿದ ಸ್ಥಳೀಯ ಸಿಪಿಐ ವೆಂಕಟಸ್ವಾಮಿ ‘ತಾಲ್ಲೂಕಿನಲ್ಲಿ ಈ ಗ್ರಾಮಗಳು ಅತಿ ಸೂಕ್ಷ್ಮ ಪ್ರದೇಶಗಳಾಗಿರುವುದರಿಂದ ಇನ್ನು ಮುಂದೆ ಯಾವುದೇ ಅಹಿತಕರ ಘಟನೆಗಳು ನಡೆದಾಗ ಈ ಬೆಟಾಲಿಯನ್ ತಂಡ ಗ್ರಾಮಕ್ಕೆ ಬಂದು ಶಾಂತಿ ಸುವ್ಯವಸ್ಥೆಯನ್ನು ಕಾಪಾಡುತ್ತದೆ. ಕೇಂದ್ರೀಯ ವಿಭಾಗದ ಆದೇಶದಂತೆ ಈ ತಂಡ ಕಾರ್ಯನಿರ್ವಹಿಸಲಿದೆ. ತಾಲ್ಲೂಕಿನಲ್ಲಿ ಬರುವ ಈ ಸೂಕ್ಷ್ಮ ಗ್ರಾಮಗಳ ಪರಿಚಯ ಮಾಡಿಕೊಳ್ಳಲು ಸುಮಾರು 35ಕ್ಕೂ ಹೆಚ್ಚಿರುವ ಬೆಟಾಲಿಯನ್ ತಂಡ ಆಯಾ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಪಥ ಸಂಚಲನ  ಮಾಡಿಸಿ ಪರಿಚಯ ಮಾಡಿಕೊಡಲಾಯಿತು’ ಎಂದು ತಿಳಿಸಿದರು. ತಹಶೀಲ್ದಾರ್‌ ಮಹದೇವ ಬಣಸಿ, ಪಿಎಸ್ಐ ದಿನೇಶ ಜವಳೇಕರ ಹಾಗೂ ಇತರೆ ಅಧಿಕಾರಿಗಳು ಇದ್ದರು.