ಕುಡಿಯುವ ನೀರಿನ ಸಮಸ್ಯೆಗೆ ಪರಿಹಾರ

ಕುಮಟಾ: ಕಳೆದ ವರ್ಷದ ಬೇಸಿಗೆಯಲ್ಲಿ ಕುಮಟಾ–ಹೊನ್ನಾವರ ಪಟ್ಟಣಕ್ಕೆ ಕುಡಿ­ಯುವ ನೀರು ಪೂರೈಕೆ ಮಾಡಲು ಸ್ಥಳೀಯ ಪುರಸಭೆ ನಡೆಸಿದ ಪ್ರಯತ್ನದ ಜೊತೆಗೆ ತುರ್ತಾಗಿ ಕೈಕೊಂಡ ಮುನ್ನೆ­ಚ್ಚರಿಕೆ ಕ್ರಮದಿಂದ ಈ ವರ್ಷ ಕುಡಿ­ಯುವ ನೀರಿನ ಸಮಸ್ಯೆ ಇಲ್ಲದಂತಾಗಿದೆ.ಕಳೆದ ವರ್ಷ ಏಪ್ರಿಲ್ ತಿಂಗಳಲ್ಲಿಯೇ ಮರಾಕಲ್ ಕುಡಿಯುವ ನೀರಿನ ಯೋಜ­ನೆಯ ಅಘನಾಶಿನಿ ನದಿ ಪ್ರದೇಶದಲ್ಲಿ ನೀರು ಸಂಪೂರ್ಣ ಬತ್ತಿ ಹೋಗಿತ್ತು. ಪುರಸಭೆ ಅಧಿಕಾರಿಗಳು, ಅಧ್ಯಕ್ಷರು, ಸದಸ್ಯರು ಸೇರಿ ಸಮೀಕ್ಷೆ ನಡೆಸಿದಾಗ ನದಿಗೆ ಅನಧಿಕೃತವಾಗಿ ನೂರಾರು ರೈತರು ಪಂಪ್ ಸೆಟ್ ಹಾಕಿ ಹಗಲು–ರಾತ್ರಿ ನೀರು ಬಳಕೆ ಮಾಡು­ತ್ತಿರುವುದು ಗೊತ್ತಾಯಿತು. ಜಿಲ್ಲಾಧಿಕಾರಿ ಆದೇಶದಂತೆ ನದಿಯಂಚಿನ ಪ್ರದೇಶದ ಎಲ್ಲ ಗ್ರಾಮಗಳ ತ್ರಿಫೇಸ್ ವಿದ್ಯುತ್ ಪೂರೈಕೆ ಅವಧಿಯನ್ನು ಕಡಿತಗೊಳಿಸಿ ಅನಧಿಕೃತ ಪಂಪ್‌ಸೆಟ್‌ಗಳನ್ನು ಕಿತ್ತು ಹಾಕಲಾಗಿತ್ತು.

ಮರಾಕಲ್ ಯೋಜನೆಯ ಜಾಕ್‌­ವೆಲ್ ಪ್ರದೇಶದ ನದಿಯ ಭಾಗದಲ್ಲಿ ಜೆಸಿಬಿಯಿಂದ ಉಸುಕಿನ ದಿಬ್ಬಗಳನ್ನು ಸೀಳಿ ಮೇಲ್ಭಾಗದ ನೀರು ಜಾಕ್‌ವೆಲ್ ಪ್ರದೇಶಕ್ಕೆ ಹರಿದು ಬರು­ವಂತೆ ಮಾಡ­ಲಾಗಿತ್ತು. ಈ ನಡುವೆ ಕುಮಟಾ–ಹೊನ್ನಾವರ ಪಟ್ಟಣಕ್ಕೆ 15 ದಿನಗಳ ಕಾಲ ನೀರು ಪೂರೈಕೆ ಇಲ್ಲದೆ ಹಾಹಾಕಾರ ಉಂಟಾಗಿತ್ತು. ಅದೇ ಸಮಯದಲ್ಲಿ ಒಣಗಿ ಹೋಗಿದ್ದ ನದಿ ಮಧ್ಯೆ ಸುಮಾರು 70 ಮೀಟರ್ ಉದ್ದ,  5 ಅಡಿ ಅಗಲ, 5 ಅಡಿ ಎತ್ತರದ ಭದ್ರವಾದ ಸಿಮೆಂಟ್ ಒಡ್ಡು ನಿರ್ಮಿಸಿ ಹೊಸ ಪ್ರಯೋಗ  ನಡೆಸಲಾಗಿತ್ತು. ಈ ಕಾರ್ಯದಿಂದಾಗಿ ವರ್ಷ ಕುಮಟಾ–ಹೊನ್ನಾವರ ಪಟ್ಟಣಗಳಿಗೆ ಬೇಸಿಗೆಯಲ್ಲಿ  ಪೂರೈಕೆ ಸಾಧ್ಯವಾಗುವಷ್ಟು ನೀರು ಸಂಗ್ರಹಗೊಂಡಿದೆ.

‘ಕಳೆದ ಬೇಸಿಗೆಯಲ್ಲಿ ನದಿಯಲ್ಲಿ ನೀರು ಕಡಿಮೆಯಾಗಿದ್ದರಿಂದ ಮರಾ­ಕಲ್ ಯೋಜನೆಯ ವಿದ್ಯುತ್ ಮೋಟಾ­ರ್ ಮುಂತಾದ ಯಂತ್ರೋಪಕ­ರಣ­ಗಳು ಕೈಕೊಟ್ಟಿದ್ದವು. ಈ ವರ್ಷ ಸುಸ್ಥಿ­ಯಲ್ಲಿರುವ ಮೂರು ನೀರೆತ್ತುವ ಯಂತ್ರ ಅಳವಡಿಸಲಾಗಿದ್ದು, ಪ್ರತಿ 15 ದಿನ­ಕ್ಕೊಮ್ಮೆ ಯಂತ್ರ ಬದಲಾಯಿಸ­ಲಾಗು­ತ್ತದೆ. ಇದರಿಂದ ಯಂತ್ರ ಕೆಡುವ ಸಾಧ್ಯತೆ ತೀರಾ ಕಡಿಮೆ’ ಎಂದು ಪುರ­ಸಭೆ ಅಧ್ಯಕ್ಷ ಸಂತೋಷ ನಾಯ್ಕ ತಿಳಿಸಿದರು.

ಮುಖ್ಯಾಧಿಕಾರಿ ಎಂ.ಕೆ. ಸುರೇಶ, ‘ ನದಿಗೆ ಅನಧಿಕೃತವಾಗಿ ಅಳವಡಿಸಿರುವ ಪಂಪ್‌ಸೆಟ್‌ ತೆರವುಗೊಳಿಸುವ ಕಾರ್ಯ ಕೈಕೊಳ್ಳಲಾಗುವುದು. ನೀರೆತ್ತಲು  ತೊಂದ­ರೆಯಾಗದಂತೆ ಹೆಚ್ಚುವರಿ ವಿದ್ಯುತ್ ಟ್ರಾನ್ಸ್‌ಫಾರ್ಮರ್ ಕೂಡ ಅಳ­ವಡಿಸಲಾಗಿದೆ. ಯೋಜನೆ ಪ್ರದೇಶದಲ್ಲಿ ಸಿಬ್ಬಂದಿ ಕಾರ್ಯನಿರ್ವಹಣೆ ವೀಕ್ಷಣೆ ಹಾಗೂ ಸುರಕ್ಷತೆಯ ದೃಷ್ಟಿಯಿಂದ ಸಿ.ಸಿ.ಟಿವಿ ಕ್ಯಾಮೆರಾ ಅಳವಡಿಸಲಾಗಿದೆ’ ಎಂದರು. ಸದಸ್ಯರಾದ ಪ್ರಶಾಂತ ನಾಯ್ಕ,  ಪ್ರಶಾಂತ ರೇವಣಕರ್, ಹೇಮಚಂದ್ರ ನಾಯ್ಕ  ಉಪಸ್ಥಿತರಿದ್ದರು.