ಅತ್ಯಾಚಾರ: ಜೀವಾವಧಿ ಶಿಕ್ಷೆ

ವಿಜಯಪುರ: ದಲಿತ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ನಡೆಸಿದ್ದ ವ್ಯಕ್ತಿಗೆ ನಗರದ ಎರಡನೇ ಹೆಚ್ಚುವರಿ ಜಿಲ್ಲಾ ಮತ್ತು ಸೆಷನ್ಸ್‌ (ವಿಶೇಷ) ನ್ಯಾಯಾಲಯ ಮಂಗಳವಾರ ಕಠಿಣ ಜೀವಾವಧಿ ಶಿಕ್ಷೆ ವಿಧಿಸಿ ಆದೇಶಿಸಿದೆ.

ಸಿಂದಗಿ ತಾಲ್ಲೂಕಿನ ಕಣಮೇಶ್ವರದ ಮಾನಪ್ಪ ಇಜೇರಿ ಎಂಬಾತ 2014ರ ಅಕ್ಟೋಬರ್‌ 11ರ ಸಂಜೆ, ಅಕ್ಕನ ಜತೆ ಕಟ್ಟಿಗೆ ಸಂಗ್ರಹಿಸಿಕೊಂಡು ಮನೆಗೆ ಬರುತ್ತಿದ್ದ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ನಡೆಸಿದ್ದ.

ಅಪಹರಿಸುವ ಸಂದರ್ಭದಲ್ಲಿ ತಂಗಿಯ ನೆರವಿಗೆ ಧಾವಿಸಿದ ಅಕ್ಕನ ಮೇಲೆ ಹಲ್ಲೆ ನಡೆಸಿದ್ದ.

ಪ್ರಕರಣದ ವಿಚಾರಣೆ ನಡೆಸಿದ ನಗರದ ಎರಡನೇ ಹೆಚ್ಚುವರಿ ಜಿಲ್ಲಾ ಮತ್ತು ಸೆಷನ್ಸ್‌ (ವಿಶೇಷ) ನ್ಯಾಯಾಲಯದ ನ್ಯಾಯಾಧೀಶ ಕಡ್ಲೂರ ಸತ್ಯನಾರಾಯಣಾಚಾರ್ಯ, ಮಾನಪ್ಪನಿಗೆ ಕಠಿಣ ಜೀವಾವಧಿ ಶಿಕ್ಷೆ, ₹ 30 ಸಾವಿರ ದಂಡ ವಿಧಿಸಿ, ನೊಂದ ಬಾಲಕಿಗೆ ಪರಿಹಾರ ನೀಡುವಂತೆ ಆದೇಶಿಸಿದ್ದಾರೆ. ಸರ್ಕಾರದ ಪರ ಸರ್ಕಾರಿ ವಕೀಲ ಎ.ಎಸ್‌.ತಮಗೊಂಡ ವಾದ ಮಂಡಿಸಿದರು.