ವಿಠ್ಠಲಮೂರ್ತಿ ವಿಚಾರಣೆ ಮುಂದೂಡಿಕೆ

ಹಾಸನ: ನಿವೃತ್ತ ಐಎಎಸ್‌ ಅಧಿಕಾರಿ ಐ.ಎಂ. ವಿಠ್ಠಲಮೂರ್ತಿ ಅವರ ಅರಣ್ಯ ಒತ್ತುವರಿ ಪ್ರಕರಣದ ವಿಚಾರಣೆಯನ್ನು ಜೂನ್‌ 16ಕ್ಕೆ ಮುಂದೂಡಲಾಗಿದೆ ಎಂದು ಸಿಸಿಎಫ್‌ ರಂಗರಾವ್‌ ತಿಳಿಸಿದ್ದಾರೆ.

ಬುಧವಾರ ನಡೆದ ವಿಚಾರಣೆಗೆ ಅವರು ಹಾಜರಾಗಲಿಲ್ಲ. ಆದರೆ, ಅವರಿಗೆ ಹಾಜರಾಗಲು ಇನ್ನೊಂದು ದಿನಾಂಕ ನೀಡಿದ್ದೇವೆ. ಜೂನ್‌ 16ರಂದೂ ಹಾಜರಾಗದಿದ್ದರೆ ಕಾನೂನು ಪ್ರಕಾರ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ತಿಳಿಸಿದ್ದಾರೆ.

ವಿಠ್ಠಲಮೂರ್ತಿ ಅವರು ಬೇಲೂರು ತಾಲ್ಲೂಕಿನ ಮಲಸಾವರದಲ್ಲಿ 19 ಎಕರೆ ಅರಣ್ಯ ಭೂಮಿ ಒತ್ತುವರಿ ಮಾಡಿದ್ದಾರೆ ಎಂದು ಅವರಿಗೆ ನೋಟಿಸ್‌ ನೀಡಲಾಗಿತ್ತು. ಇದಾದ ನಂತರ ಅವರೇ ಜಂಟಿ ಸರ್ವೆ ನಡೆಸುವಂತೆ ಮನವಿ ಮಾಡಿದ್ದರು. ಒತ್ತುವರಿ ಮಾಡಿರುವುದು ಸರ್ವೆಯಿಂದ ದೃಢಪಟ್ಟ ನಂತರ ಇಲಾಖೆಯವರು ಅದನ್ನು ತೆರವು ಮಾಡಲು ಮುಂದಾಗಿದ್ದರು. ಇದನ್ನು ಪ್ರಶ್ನಿಸಿ ವಿಠ್ಠಲಮೂರ್ತಿ ಅವರು ಸಿಸಿಎಫ್‌ ನ್ಯಾಯಾಲಯದ ಮೊರೆ ಹೋಗಿದ್ದರು. ಬುಧವಾರ ಅವರ ದೂರಿನ ವಿಚಾರಣೆ ನಿಗದಿಗೊಳಿಸಲಾಗಿತ್ತು. ಆದರೆ, ಅವರು ವಿಚಾರಣೆಗೆ ಹಾಜರಾಗಿಲ್ಲ.