ಒಬ್ಬಂಟಿಯಾಗಿ ವಿದೇಶ ಪ್ರವಾಸ ಮಾಡಿದ ಮೆಲಾನಿಯಾ ಟ್ರಂಪ್‌

ವಾಷಿಂಗ್ಟನ್‌: ಅಮೆರಿಕದ ಮೊದಲ ಮಹಿಳಾ ಪ್ರಜೆಯಾಗಿರುವ ಮೆಲಾನಿಯಾ ಟ್ರಂಪ್ ಇದೀಗ ಮಹತ್ವದ ನಿರ್ಧಾರ ತೆಗೆದುಕೊಳ್ಳುವ ಮೂಲಕ ಗಮನಸೆಳೆದಿದ್ದಾರೆ.

ಗಾಯಾಳು ಸೈನಿಕರ ಅಂತರರಾಷ್ಟ್ರೀಯ ಕ್ರೀಡಾಕೂಟ ತಂಡದ ಅಮೆರಿಕ ನೇತೃತ್ವವನ್ನು ಅವರು ವಹಿಸಿದ್ದಾರೆ. ಈ ಮೂಲಕ ಡೊನಾಲ್ಡ್ ಟ್ರಂಪ್‌ ಅವರು ಅಮೆರಿಕ ಅಧ್ಯಕ್ಷರಾದ ಬಳಿಕ ಇದೇ ಮೊದಲ ಬಾರಿಗೆ ಪತಿಯನ್ನು ಬಿಟ್ಟು ವಿದೇಶ ಪ್ರವಾಸಕ್ಕೆ ತೆರಳಿದ್ದಾರೆ.

ಟೊರಂಟೊದಲ್ಲಿ ಶನಿವಾರ ತಂಗಲಿರುವ ಮೆಲಾನಿಯಾ ರಾಜಾತಿಥ್ಯವನ್ನು ಪಡೆಯಲಿದ್ದಾರೆ. 2014ರಲ್ಲಿ ‘ಇನ್‌ವಿಕ್ಟಸ್‌ ಕ್ರೀಡಾಕೂಟ’ ಆರಂಭಿಸಿದ ಬ್ರಿಟನ್‌ನ ರಾಜಕುಮಾರ ಹ್ಯಾರಿಯನ್ನು ಮೊತ್ತಮೊದಲ ಬಾರಿ ಭೇಟಿಯಾಗಲಿದ್ದಾರೆ.

ಪ್ರವಾಸದಲ್ಲಿ ಕೆನಡಾದ ಪ್ರಧಾನಿ ಜಸ್ಟಿನ್‌ ಟ್ರುಡಿಯು ಅವರನ್ನು ಭೇಟಿಯಾಗಲಿದ್ದು, ಉದ್ಘಾಟನಾ ಸಮಾರಂಭದಲ್ಲೂ ಭಾಗವಹಿಸಲಿದ್ದಾರೆ.