‘ಕೂ’ ಸಂಸ್ಥೆಗೆ 1 ವರ್ಷದಲ್ಲಿ 500 ಸಿಬ್ಬಂದಿ ನೇಮಕ ಗುರಿ: ಅಪ್ರಮೇಯ ರಾಧಾಕೃಷ್ಣ

ನವದೆಹಲಿ: ಮುಂದಿನ ಒಂದು ವರ್ಷದಲ್ಲಿ ಸ್ವದೇಶಿ ಮೈಕ್ರೋ ಬ್ಲಾಗಿಂಗ್ ಜಾಲತಾಣ ‘ಕೂ’ 500ಕ್ಕೂ ಹೆಚ್ಚು ಜನರಿಗೆ ಉದ್ಯೋಗ ಕಲ್ಪಿಸುವ ನಿರೀಕ್ಷೆಯಿದೆ.

‘ಕೂ’ ಸಂಸ್ಥೆಯು ಎಂಜಿನಿಯರಿಂಗ್‌, ಉತ್ಪನ್ನ ಮತ್ತು ಸಮುದಾಯ ನಿರ್ವಹಣಾ ತಂಡಗಳಿಗಾಗಿ ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುತ್ತಿದೆ.

ಇತ್ತೀಚಿಗೆ 1 ಕೋಟಿ ಬಳಕೆದಾರರ ಗುರಿಯನ್ನು ತಲುಪಿದ ‘ಕೂ’ನಲ್ಲಿ ಪ್ರಸ್ತುತ 200 ಉದ್ಯೋಗಿಗಳಿದ್ದಾರೆ.

‘ಪ್ರಸ್ತುತ ನಾವು 200 ಮಂದಿ ಇದ್ದೇವೆ. ಮುಂದಿನ ಒಂದು ವರ್ಷದಲ್ಲಿ ಎಂಜಿನಿಯರಿಂಗ್‌, ಉತ್ಪನ್ನ ಮತ್ತು ಸಮುದಾಯ ನಿರ್ವಹಣೆ ವಿಭಾಗಗಳಿಗೆ ಕನಿಷ್ಠ 500 ಮಂದಿಯನ್ನು ನೇಮಕ ಮಾಡಿಕೊಳ್ಳಲಿದ್ದೇವೆ’ ಎಂದು ‘ಕೂ’ ಸಹ-ಸಂಸ್ಥಾಪಕ ಅಪ್ರಮೇಯ ರಾಧಾಕೃಷ್ಣ ಅವರು ಪಿಟಿಐಗೆ ತಿಳಿಸಿದರು.

ಸರ್ಕಾರಿ ಸಂಬಂಧಗಳು, ಮಾರ್ಕೆಂಟಿಗ್‌, ಬ್ರ್ಯಾಂಡ್‌ ಮಾರ್ಕೆಂಟಿಗ್‌ ವಿಭಾಗದಲ್ಲೂ ನೇಮಕಾತಿಯನ್ನು ಮಾಡಿಕೊಳ್ಳಲಾಗುತ್ತಿದೆ.

‘ಭಾರತೀಯ ತಂತ್ರಜ್ಞಾನವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯುವ ಸಾಮರ್ಥ್ಯವಿರುವ ಪ್ರತಿಭಾವಂತ ವ್ಯಕ್ತಿಗಳೊಂದಿಗೆ ಕೆಲಸ ಮಾಡಲು ನಾವು ಇಚ್ಛಿಸುತ್ತೇವೆ’ ಎಂದು ಅವರು ಅಭಿಪ್ರಾಯಪಟ್ಟರು.