ಇದು ಸಸ್ಯ ಜಗತ್ತಿನ ಸೋಜಿಗಗಳ ವೃತ್ತಿ ಕಥನಗಳನ್ನು ಒಳಗೊಂಡ ಅಪರೂಪದ ಕೃತಿ. ಪತ್ತೆದಾರಿಕೆಯ ಶೈಲಿಯಲ್ಲೇ ಸಸ್ಯ ಲೋಕವನ್ನು ಲೇಖಕರು ಅನಾವರಣಗೊಳಿಸಿದ್ದಾರೆ. ಸಸ್ಯಗಳು ಪಾಪದ ಜೀವಗಳು, ಅವುಗಳಲ್ಲಿ ಹಿಂಸೆ, ಕಾಮ, ಕ್ರೋಧ ಇಲ್ಲವೆಂದೇ ನಾವೆಲ್ಲರೂ ನಂಬಿರುವ ಸಿದ್ಧನಂಬಿಕೆಯನ್ನು ಈ ಕೃತಿ ಹೊಡೆದು ಬಿಸಾಕುತ್ತದೆ.
ಸಸ್ಯ ಪ್ರಪಂಚದಲ್ಲೂ ಕಾಮ, ದ್ವೇಷ, ಸ್ವಾರ್ಥ, ಹಿಂಸೆ ಮುಂತಾದ ನಡೆಗಳು ಪ್ರಾಣಿ ಪ್ರಪಂಚದಲ್ಲಿ ಇರುವಂತೆಯೇ ಇದೆ, ಮನುಷ್ಯ ಪ್ರಪಂಚದಲ್ಲಿ ಇರುವಂತೆ ಕೊಲೆ– ಸುಲಿಗೆಯೂ ಇದೆ ಎನ್ನುವುದನ್ನು ಇಲ್ಲಿನ ಬರಹಗಳು ಸಾಕ್ಷೀಕರಿಸುತ್ತವೆ. ಸಸ್ಯಗಳಿಗೆ ಇರುವೆಗಳೊಂದಿಗೆ ಇರುವ ಅನನ್ಯ ಸಹಜೀವನ ಮತ್ತು ಕಣಜಗಳೊಂದಿಗೆ ಇರುವ ಚೌಕಾಸಿ ವ್ಯವಹಾರದ ಕುತೂಹಲವನ್ನು ಈ ಕೃತಿ ತೆರೆದಿಟ್ಟಿದೆ. ಓದಿನ ಸುಖ ಹೆಚ್ಚಿಸಲು ಹೋಗಿ ಅಲ್ಲಲ್ಲಿ ಸಿನಿಕತನದ ವಿವರಣೆಗಳನ್ನು ತುರುಕಿರುವುದರಿಂದ ಪ್ರಮುಖ ವಿಷಯಗಳೇ ಗೌಣವಾಗಿ ಕಾಣಿಸುವುದು ಉಂಟು. ಇದನ್ನು ಕಾದಂಬರಿಯಂತೆ ಒಂದೇ ಓಘದಲ್ಲಿ ಓದಿಮುಗಿಸಬೇಕಾದ ಉಮೇದು ಎದುರಾಗುವುದಿಲ್ಲ; ಪ್ರಬಂಧಗಳ ಸಂಕಲನದಂತಿರುವುದರಿಂದ ಯಾವುದೇ ಅಧ್ಯಾಯದಿಂದಲೂ ಓದು ಆರಂಭಿಸಬಹುದು. ಸಂಶೋಧನಾ ಕ್ಷೇತ್ರಗಳ ವಿದ್ಯಾರ್ಥಿಗಳಿಗೆ ಈ ಕೃತಿ ಪ್ರೇರಣದಾಯಕವೂ ಆಗಿದೆ. ವಿಜ್ಞಾನ ವಿದ್ಯಾರ್ಥಿಗಳನ್ನು ದೃಷ್ಟಿಯಲ್ಲಿಟ್ಟುಕೊಂಡು ಈ ಕೃತಿ ಬರೆದಿದ್ದರೂ ವಿಜ್ಞಾನಿಯೂ ಸಾಮಾನ್ಯ ಮನುಷ್ಯ, ಆ ಮನುಷ್ಯನ ಬದುಕಿನಲ್ಲೂ ಆಸೆ, ನಿರಾಸೆಗಳು, ಭಾವನೆಗಳು, ವಿಜ್ಞಾನ ರಾಜಕೀಯದ ಚದುರಂಗದಾಟಗಳು, ನೋವು ನಲಿವುಗಳು, ಆತಂಕದ ಕ್ಷಣಗಳು ಇವೆ ಎನ್ನುವುದು ಈ ಕೃತಿ ಓದುವಾಗ ವೇದ್ಯವಾಗುವುದು ಖರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.