ಮೊದಲ ಓದು | ವೈಕಲ್ಯ ಮೀರುವ ಬಗೆ ವಿವರಿಸುತ್ತ...

ಕಿವಿ ಕೇಳಿಸದು ಎಂಬ ಲೋಪ ಎಲ್ಲಿಯೂ ಕಾಣದಂತೆ ಮಕ್ಕಳನ್ನು ಬೆಳೆಸುವ ಕಥನ ಈ ಪುಸ್ತಕದ್ದು. ಲೇಖಕಿ ತಮ್ಮ ವೈಕಲ್ಯವನ್ನು ಮಕ್ಕಳು ಹೇಗೆ ಒಪ್ಪಿಕೊಂಡರು, ಅದ್ಹೇಗೆ ಸಹಜವಾಗಿ ಸ್ವೀಕರಿಸಿದರು, ಯಾರಾದರೂ ಹೀಯಾಳಿಸಿದರೆ ಅಮ್ಮನನ್ನು ಸುರಕ್ಷಿತವಾಗಿಡುವ ಗೋಡೆಯಾದರು ಎಂಬಂಥ ಸಣ್ಣ ಸಣ್ಣ ಘಟನೆಗಳನ್ನಾಧರಿಸಿದ ಪುಸ್ತಕ. 

ತಾಯಿಯೊಬ್ಬಳ, ಮೊಮ್ಮಕ್ಕಳ ಮುಂದೆ, ಮಕ್ಕಳ ಸಾಹಸ, ಪರಾಕ್ರಮ ಮತ್ತು ಬಾಲ್ಯವನ್ನು ರಸವತ್ತಾಗಿ ಹೇಳುವಂತೆಯೇ ಈ ಪುಸ್ತಕದ ನಿರೂಪಣೆ ಇದೆ. ಪತ್ರಕರ್ತನ ಹೆಂಡ್ತಿಯಾಗಿ ಸಂಸಾರ ನಿಭಾಯಿಸುವುದು ಒಂದು ಕಲೆ ಮತ್ತು ಸವಾಲು ಎಂಬಂತೆ ಅಲ್ಲಲ್ಲಿ ಅವರ ನೆನಪುಗಳು ಧ್ವನಿಸುತ್ತವೆ. ಆದರೆ ಢಾಳಾಗಿ ಕಾಣಿಸಿಕೊಳ್ಳುವುದು, ಎಲ್ಲರಂತಲ್ಲದ ಅಮ್ಮ, ಮಕ್ಕಳನ್ನು ಬೆಳೆಸುವಾಗ ತನ್ನೊಳಗಿನ ಆತಂಕವನ್ನು ಮೀರಿದ ಬಗೆ. ಇಬ್ಬರು ಮಕ್ಕಳನ್ನು ಬೆಳೆಸುವಾಗ ಅವರ ಒಳಜಗಳ, ಯಾರ ಪರವಹಿಸಬೇಕು ಎಂಬುದನ್ನು ಕಣ್ಣಲ್ಲಿಯೇ ಅಳೆಯುವುದು, ಮಕ್ಕಳ ಸ್ನೇಹಿತರಿಗೂ ಅಮ್ಮನಾಗುವ ಬಗೆ ಮೊದಲಾದ ಹೃನ್ಮನ ಸೆಳೆಯುವಂಥ ಸಂಗತಿಗಳು ಇಲ್ಲಿ ದಾಖಲಾಗಿವೆ.

ಇಲ್ಲಿ ಪೇರೆಂಟಿಂಗ್‌ ಸವಾಲುಗಳೊಂದಿಗೆ ವೈಕಲ್ಯ ಮೀರುವ ಬಗೆಯನ್ನೂ ಹೇಳುತ್ತ ಹೋಗುತ್ತಾರೆ. ಅಲ್ಲಲ್ಲಿ ತಾವು ನಿಭಾಯಿಸಿದ ರೀತಿಗೆ ತಾವೇ ಸೋಜಿಗಪಡುತ್ತಾರೆ, ಓದುಗರಂತೆಯೇ! ವಿಘಟಿತ ಕುಟುಂಬ, ವರ್ಗಾವಣೆಯ ಜೀವನ ಮಕ್ಕಳನ್ನೂ ಬೆಳೆಸುವ ಲೇಖಕಿಗೆ ಸಾರ್ಥಕ್ಯ ಕಾಣಿಸುವುದು, ಮಕ್ಕಳು ಅಮ್ಮನನ್ನು ಹೊಗಳಿದಾಗ. ದೊಡ್ಡ ಹುದ್ದೇಗೇರಿದ ಮಕ್ಕಳು ಕಲಿತಿದುದೆಲ್ಲವೂ ಅಮ್ಮನಿಂದ ಎಂದಾಗ. ಆ ವಾಕ್ಯ ಓದುವಾಗ ತಾಯ್ತನದ ಮೊದಲ ಸಂತೋಷದಂತೆಯೇ ಕಣ್ಣಪಸೆಯಲ್ಲಿ ಪುಸ್ತಕ ಮುಗಿದಿದ್ದು ತಿಳಿಯುತ್ತದೆ.

ಕೇಳದ ಕಿವಿಗಳು ಹೇಳಿದ ಕತೆ

ಲೇ: ಸುಚೇತ

ಕೆ.ಎಸ್‌ಪ್ರ: ಅನ್ನಪೂರ್ಣ ಪಬ್ಲಿಷಿಂಗ್‌ ಹೌಸ್‌