ನಾ ದಿವಾಕರ ಅವರ ಕವನ 'ಶೋಧ ಮರುಶೋಧದ ದಾರಿ'

ಅನಾಥ ಭಾವ ಕಳೆಯಲು ತುಸು ನಗು ಬೇಕಿದೆ
ಮಸಣ ಮೌನದ ಅಂಗಳದಲಿ ಹುಡುಕುವಿರಾ ?

ಆಡುವ ಪಿಸು ನುಡಿಗೊಂದು ತೆರೆದ ಕಿವಿ ಬೇಕಿದೆ
ಮನದ ಮೌನಕೆ ತುಡಿವ ಹೃದಯ ಅರಸುವಿರಾ ?

ಏಕಾಂತ ಭಾವ ತರಂಗಗಳಿಗೆ ಬಿಗಿಯಪ್ಪುಗೆ ಬೇಕಿದೆ
ಸದ್ದಿಲ್ಲದ ಕ್ಷಣಭಂಗುರ ಸುನಾದ ಉಣಬಡಿಸುವಿರಾ ?

ಸವೆದ ಹೆಜ್ಜೆಗಳ ದಿನಚರಿಗೊಂದು ಖಾಲಿಹಾಳೆ ಬೇಕಿದೆ
ಶಾಯಿ ಇಲ್ಲದ ಲೇಖನಿಗೆ ಎರಡು ಹನಿ  ನೀಡುವಿರಾ  ?

ಗೂಡು ತಪ್ಪಿದ ಮರಿಹಕ್ಕಿಗೆ ಆಸರೆಯೊಂದು ಬೇಕಿದೆ
ರೆಕ್ಕೆಮೂಡದ ಕಂದನಿಗೆ ತಾಯ್ಮಡಿಲ ಕೊಡಿಸುವಿರಾ  ?

ಬೇಕು ಬೇಡಗಳ ಸಂತೆಮಾಳದಲಿ ವಾತ್ಸಲ್ಯ ಬೇಕಿದೆ
ಮಾರುವವರು ಕಂಡರೆ ಹೊಸ್ತಿಲಿಗೆ ಕರೆತರುವಿರಾ ?