ಸೃಷ್ಟಿಗೆ ಅಂದವ ತುಂಬುವ ಹೂಗಳೆ
ನಿಮ್ಮನು ಭೂಮಿಗೆ ತಂದವರಾರು
ದೃಷ್ಟಿಗೆ ಮೆರುಗನು ನೀಡುವ ಹೂಗಳೆ
ನಿಮ್ಮೊಳು ಮೊದಲಿಗೆ ಬಂದವರಾರು
ತರತರ ಬಣ್ಣದಿ ಮೆರೆಯುವ ಹೂಗಳೆ
ನಿಮಗೆ ಬಣ್ಣವ ಕೊಟ್ಟವರಾರು
ನಾನಾ ಹೆಸರನು ಹೊಂದಿದ ಹೂಗಳೆ
ನಿಮಗೆ ಹೆಸರನು ಇಟ್ಟವರಾರು
ಘಮಘಮ ಪರಿಮಳ ಬೀರುವ ಹೂಗಳೆ
ನಿಮಗೆ ಗಂಧವ ಸುರಿದವರಾರು
ಫಳಫಳ ಹೊಳೆಯುವ ಸುಂದರ ಹೂಗಳೆ
ನಿಮಗೆ ಅರಳಲು ತಿಳಿಸಿದರಾರು
ದೇವರ ಪೂಜೆಗೆ ಸಲ್ಲುವ ಹೂಗಳೆ
ನಿಮ್ಮಯ ವಿಸ್ಮಯ ತಿಳಿದವರಾರು
ಸಕಲರ ಮನವನು ಸೆಳೆಯುವ ಹೂಗಳೆ
ನಿಮ್ಮಯ ನಗುವಿಗೆ ಕಾರಣರಾರು
ಎಲ್ಲಾ ಕಾಲದಿ ದೊರೆಯುವ ಹೂಗಳೆ
ನಿಮ್ಮಯ ಕಷ್ಟಕೆ ಆಗುವರಾರು
ಕಾಣದೆ ಹೋದರೆ ಜಗದಲಿ ಹೂಗಳೆ
ನಿಮ್ಮಯ ಸ್ಥಾನವ ತುಂಬುವರಾರು!?
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.