ಇನ್ಫೋಸಿಸ್ ಬಿಪಿಒ ವಶಕ್ಕೆ ಪೋರ್ಟ್‌ಲ್ಯಾಂಡ್ ಗ್ರೂಪ್

ಬೆಂಗಳೂರು: ದೇಶದ 2ನೇ ಅತಿದೊಡ್ಡ ಸಾಫ್ಟ್‌ವೇರ್ ರಫ್ತು ಸಂಸ್ಥೆಯಾಗಿರುವ ಇನ್ಫೋಸಿಸ್‌ನ ಹೊರಗುತ್ತಿಗೆ (ಬಿಪಿಒ) ವಿಭಾಗವು, ಆಸ್ಟ್ರೇಲಿಯಾ ಮೂಲದ ಪೋರ್ಟ್‌ಲ್ಯಾಂಡ್ ಗ್ರೂಪ್ ಅನ್ನು 3.7 ಕೋಟಿ ಡಾಲರ್‌ಗಳಿಗೆ (ರೂ. 195.44 ಕೋಟಿ) ಸ್ವಾಧೀನಪಡಿಸಿಕೊಳ್ಳಲಿದೆ.

ಈ ಸ್ವಾಧೀನ ಪ್ರಕ್ರಿಯೆ 2012ರ ಜನವರಿ ತಿಂಗಳಲ್ಲಿ ಪೂರ್ಣಗೊಳ್ಳಲಿದೆ ಎಂದು `ಇನ್ಫೋಸಿಸ್ ಬಿಪಿಒ~ದ ಮುಖ್ಯ ಕಾರ್ಯನಿರ್ವಾಹಣಾ ಅಧಿಕಾರಿ ಸ್ವಾಮಿ ಸ್ವಾಮಿನಾಥನ್ ತಿಳಿಸಿದ್ದಾರೆ.ಸಿಡ್ನಿಯಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಪೋರ್ಟ್‌ಲ್ಯಾಂಡ್ ಗ್ರೂಪ್, ಮೆಲ್ಬರ್ನ್, ಬ್ರಿಸ್ಬೇನ್ ಮತ್ತು  ಪರ್ತ್‌ಗಳಲ್ಲಿ ಕಚೇರಿ ಹೊಂದಿದ್ದು, 113  ತಂತ್ರಜ್ಞರನ್ನು ಒಳಗೊಂಡಿದೆ.

`ಇನ್ಫೋಸಿಸ್ ಬಿಪಿಒ~ದ ಮೂರನೇ ಸ್ವಾಧೀನ ಯತ್ನ ಇದಾಗಿದೆ. 2007ರಲ್ಲಿ  ಡೆನ್ಮಾರ್ಕ್‌ನ ಗ್ರಾಹಕ ಸರಕುಗಳ ದೈತ್ಯ ಸಂಸ್ಥೆ ಫಿಲಿಪ್ಸ್ ಜತೆ 7 ವರ್ಷಗಳ ಒಪ್ಪಂದಕ್ಕೆ ಅಂಕಿತ ಹಾಕಿತ್ತು. ಒಪ್ಪಂದದ ಅನ್ವಯ, ಭಾರತ, ಪೋಲಂಡ್ ಮತ್ತು ಥಾಯ್ಲೆಂಡ್‌ನಲ್ಲಿನ ಫಿಲಿಪ್ಸ್‌ನ ಹೊರಗುತ್ತಿಗೆ ಕೇಂದ್ರಗಳನ್ನು ಸ್ವಾಧೀನಪಡಿಸಿಕೊಂಡಿತ್ತು. 2009ರಲ್ಲಿ ಅಟ್ಲಾಂಟಾ ಮೂಲದ ಮ್ಯಾಕ್‌ಮಿಷ್ ಸಿಸ್ಟಮ್ಸ ಅನ್ನು 38 ದಶಲಕ್ಷ ಡಾಲರ್‌ಗಳಿಗೆ (ಅಂದಾಜು ರೂ.180 ಕೋಟಿಗಳಿಗೆ) ಸ್ವಾಧೀನಪಡಿಸಿಕೊಂಡಿತ್ತು.