ಬಂಧನ್‌ ಬ್ಯಾಂಕ್‌ ಷೇರುಪೇಟೆಗೆ

ಮುಂಬೈ: ಬಂಧನ್‌ ಬ್ಯಾಂಕ್‌ನ ಷೇರುಪೇಟೆ ವಹಿವಾಟಿಗೆ ಮಂಗಳವಾರ ಚಾಲನೆ ನೀಡಲಾಯಿತು. ಆರಂಭದ ದಿನವೇ ಷೇರಿನ ಬೆಲೆ ಶೇ 33ರಷ್ಟು ಏರಿಕೆ ದಾಖಲಿಸಿ ಉತ್ತಮ ಆರಂಭ ಕಂಡಿತು.

ಮುಂಬೈ ಷೇರುಪೇಟೆಯಲ್ಲಿ, ನೀಡಿಕೆಯ ಬೆಲೆಯಾದ ₹ 375ರ ಬದಲಿಗೆ ₹ 485ರ ಮಟ್ಟದಲ್ಲಿ (ಶೇ 29.33) ವಹಿವಾಟಿಗೆ ಚಾಲನೆ ಪಡೆಯಿತು. ರಾಷ್ಟ್ರೀಯ ಷೇರುಪೇಟೆ ನಿಫ್ಟಿಯಲ್ಲಿ ₹ 499ಕ್ಕೆ (ಶೇ 33) ಏರಿಕೆ ದಾಖಲಿಸಿತು.

₹ 4,473 ಕೋಟಿಗಳ ಆರಂಭಿಕ ಸಾರ್ವಜನಿಕ ಕೊಡುಗೆಗೆ 14 ಪಟ್ಟು ಬೇಡಿಕೆ ವ್ಯಕ್ತವಾಗಿತ್ತು. ಷೇರಿನ ಬೆಲೆ ಪಟ್ಟಿ ₹ 370 ರಿಂದ ₹ 375ಕ್ಕೆ ನಿಗದಿಪಡಿಸಲಾಗಿತ್ತು. ಬ್ಯಾಂಕ್‌ನ ಮಾರುಕಟ್ಟೆ ಮೌಲ್ಯ ₹ 56,915 ಕೋಟಿಗಳಷ್ಟಾಗಿದೆ.