ಭಾರತದಲ್ಲಿ ತಯಾರಿಸಿ: ಫ್ರಾನ್ಸ್‌ ಬಲ

ನವದೆಹಲಿ (ಪಿಟಿಐ): ಭಾರತದಲ್ಲಿರುವ 400 ಕ್ಕೂ ಹೆಚ್ಚು ಫ್ರಾನ್ಸ್‌ ಕಂಪೆನಿಗಳು ಐದು ವರ್ಷಗಳಲ್ಲಿ ₹120 ಸಾವಿರ ಕೋಟಿಗೂ ಹೆಚ್ಚು ಬಂಡವಾಳ ಹೂಡಿವೆ ಎಂದು ಫ್ರಾನ್ಸ್‌ ಹಣಕಾಸು ಸಚಿವ ಮೈಕೆಲ್‌ ಸಪಿನ್‌ ಹೇಳಿದರು.

ಕೈಗಾರಿಕಾ ಹಾಗೂ ತಯಾರಿಕಾ ವಲಯದಲ್ಲಿ ಮುಂದಿನ ಐದು ವರ್ಷಗಳಲ್ಲಿ ₹ 68 ಸಾವಿರ ಕೋಟಿ ಬಂಡವಾಳ ಹೂಡಲಿದ್ದು ‘ಭಾರತದಲ್ಲಿ ತಯಾರಿಸಿ’ ಕಾರ್ಯಕ್ರಮಕ್ಕೆ ಹೆಚ್ಚಿನ ಬಲ ದೊರೆಯಲಿದೆ ಎಂದರು. 

ಭಾರತೀಯ ವಾಣಿಜ್ಯ ಹಾಗೂ ಕೈಗಾರಿಕಾ ಒಕ್ಕೂಟ (ಫಿಕ್ಕಿ)  ಸೋಮವಾರ ಆಯೋಜಿಸಿದ್ದ ಇಂಡಿಯಾ –ಫ್ರಾನ್ಸ್‌ ವಾಣಿಜ್ಯ ಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು. 2020–22ರ ವೇಳೆಗೆ ಭಾರತದ ಒಟ್ಟು ಸೌರಶಕ್ತಿ ವಿದ್ಯುತ್‌ ಉತ್ಪಾದನೆಯಲ್ಲಿ ಫ್ರಾನ್ಸ್‌ ಕಂಪೆನಿಗಳ ಪಾಲು ಶೇ 10ರಷ್ಟಿರಲಿದೆ ಎಂದರು.  ಅತಿಹೆಚ್ಚು ಹೂಡಿಕೆ ಮಾಡಿದ ರಾಷ್ಟ್ರ ಗಳಲ್ಲಿ ಫ್ರಾನ್ಸ್‌ 3ನೇ ಸ್ಥಾನದಲ್ಲಿ ಇರಲಿದೆ.