ವಾಣಿಜ್ಯ ಎಸ್‌ಎಂಎಸ್‌ಗೆ ಟ್ರಾಯ್ ಶುಲ್ಕದ ಪೆಟ್ಟು

ನವದೆಹಲಿ (ಪಿಟಿಐ): ಚಂದಾದಾರರಿಗೆ ಕಿರಿಕಿರಿ ಉಂಟುಮಾಡುವ ಅನಪೇಕ್ಷಿತ ವಾಣಿಜ್ಯ `ಎಸ್‌ಎಂಎಸ್~ಗಳ ಹಾವಳಿ ತಡೆಯಲು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಟೆಲಿಮಾರ್ಕೆಟಿಂಗ್ ಕಂಪೆನಿಗಳ ಮೇಲೆ ಇನ್ನಷ್ಟು ನಿರ್ಬಂಧ ಹೇರಿದೆ.

ಇನ್ನು ಮುಂದೆ ಕಂಪೆನಿಗಳು ಒಂದು ಸಿಮ್‌ನಿಂದ ದಿನವೊಂದಕ್ಕೆ ವಾಣಿಜ್ಯ ಉದ್ದೇಶದ 100 `ಎಸ್‌ಎಂಎಸ್~ ಮಾತ್ರ ಕಳುಹಿಸಬಹುದು. ನಂತರದ ಪ್ರತಿ `ಎಸ್‌ಎಂಎಸ್~ಗೂ ಕನಿಷ್ಠ 50 ಪೈಸೆಯಂತೆ ಹೆಚ್ಚುವರಿ ದರ ಪಾವತಿಸಬೇಕಾಗುತ್ತದೆ ಎಂದು `ಟ್ರಾಯ್~ ಎಚ್ಚರಿಸಿದೆ.

`ಟ್ರಾಯ್~ನಲ್ಲಿ ನೋಂದಾಯಿಸಿಕೊಳ್ಳದ ಕೆಲವು ಟೆಲಿಮಾರ್ಕೆಟಿಂಗ್ ಕಂಪೆನಿಗಳು ದೂರವಾಣಿ ಸೇವಾ ಸಂಸ್ಥೆಗಳು ಒದಗಿಸುವ `ಎಸ್‌ಎಂಎಸ್ ದರ ವಿನಾಯ್ತಿ~ ಲಾಭ ಪಡೆದು ಒಟ್ಟಿಗೇ ಸಾವಿರಾರು  `ಎಸ್‌ಎಂಎಸ್~ ರವಾನಿಸುತ್ತಿದ್ದವು. ಎರಡು ವಾರಗಳ ಹಿಂದೆ ದೂರವಾಣಿ ಸಚಿವ ಕಪಿಲ್ ಸಿಬಲ್ ಅವರ ಮೊಬೈಲ್‌ಗೂ ಇಂತಹುದೇ `ಎಸ್‌ಎಂಎಸ್~ ಬಂದು ಕಿರಿಕಿರಿ ಮಾಡಿತ್ತು.

ಸಾಮಾನ್ಯ ಗ್ರಾಹಕರಿಗೂ ಹೀಗೆಯೇ ಕಿರಿಕಿರಿ ಆಗುತ್ತಿದೆ ಎಂಬುದು ಅರಿವಾದ ಹಿನ್ನೆಲೆಯಲ್ಲಿ ಉಚಿತ `ಎಸ್‌ಎಂಎಸ್~ಗಳಿಗೆ 100ಕ್ಕೆ ಮಿತಿ ವಿಧಿಸಲಾಗಿದೆ. ಮುಂದಿನ 15 ದಿನಗಳಲ್ಲಿ ಇದು ಜಾರಿಗೆ ಬರಲಿದೆ.