ಈಕ್ವಿಟಿ ಮ್ಯೂಚುವಲ್‌ ಫಂಡ್‌: ಒಳಹರಿವು ಇಳಿಕೆ

ಮುಂಬೈ: ಈಕ್ವಿಟಿ ಮ್ಯೂಚುವಲ್‌ ಫಂಡ್‌ಗಳಿಗೆ ಹರಿದುಬರುವ ನಿವ್ವಳ ಮೊತ್ತವು ಅಕ್ಟೋಬರ್‌ನಲ್ಲಿ ಶೇಕಡ 19ರಷ್ಟು ಕಡಿಮೆ ಆಗಿದ್ದು, ₹24,690 ಕೋಟಿಗೆ ತಲುಪಿದೆ. ಈಕ್ವಿಟಿ ಮ್ಯೂಚುವಲ್‌ ಫಂಡ್‌ಗಳಿಗೆ ಹರಿದುಬರುವ ಮೊತ್ತವು ಸತತ ಮೂರು ತಿಂಗಳುಗಳಿಂದ ಕಡಿಮೆ ಆಗುತ್ತಿದೆ.

ವ್ಯವಸ್ಥಿತ ಹೂಡಿಕೆ ಯೋಜನೆಗಳ (ಎಸ್‌ಐಪಿ) ಮೂಲಕ ಹೂಡಿಕೆ ಆಗಿರುವ ಒಟ್ಟು ಮೊತ್ತವು ₹29,529 ಕೋಟಿ ಆಗಿದೆ. ಚಿನ್ನದ ಬೆಲೆಯು ಅಕ್ಟೋಬರ್‌ನಲ್ಲಿ ಏರಿಕೆ ಕಂಡಿದ್ದ ಕಾರಣದಿಂದಾಗಿ ಚಿನ್ನದ ಇಟಿಎಫ್‌ಗಳಲ್ಲಿ ಒಟ್ಟು ₹7,743 ಕೋಟಿ ನಿವ್ವಳ ಹೂಡಿಕೆ ಆಗಿದೆ ಎಂದು ಭಾರತೀಯ ಮ್ಯೂಚುವಲ್ ಫಂಡ್‌ ಕಂಪನಿಗಳ ಒಕ್ಕೂಟವು (ಎಎಂಎಫ್‌ಐ) ಹೇಳಿದೆ.

ಅಕ್ಟೋಬರ್‌ನಲ್ಲಿ ಹೂಡಿಕೆದಾರರು ಒಟ್ಟು ₹38,920 ಕೋಟಿಯನ್ನು ಹಿಂಪಡೆದಿದ್ದಾರೆ. ಅಕ್ಟೋಬರ್‌ 31ರ ವೇಳೆಗೆ ಈಕ್ವಿಟಿ ಯೋಜನೆಗಳಲ್ಲಿ ಹೂಡಿಕೆ ಆಗಿರುವ ಒಟ್ಟು ಮೊತ್ತವು ₹35.16 ಲಕ್ಷ ಕೋಟಿ ಆಗಿತ್ತು. ಮ್ಯೂಚುವಲ್ ಫಂಡ್‌ ಉದ್ಯಮವು ನಿರ್ವಹಿಸುತ್ತಿರುವ ಒಟ್ಟು ಹೂಡಿಕೆಗಳ ಮೊತ್ತವು ಶೇ 5ರಷ್ಟು ಹೆಚ್ಚಾಗಿ ₹79.88 ಲಕ್ಷ ಕೋಟಿಗೆ ತಲುಪಿದೆ.

ಎಸ್‌ಐಪಿ ಮೂಲಕ ಆಗಿರುವ ಹೂಡಿಕೆಯ ಮೊತ್ತವು ಈಗ ₹16.25 ಲಕ್ಷ ಕೋಟಿಗೆ ತಲುಪಿದೆ. ಸಕ್ರಿಯ ಎಸ್‌ಐಪಿ ಖಾತೆಗಳ ಸಂಖ್ಯೆಯು 9.45 ಕೋಟಿಯಷ್ಟು ಆಗಿದೆ.