Exports: ರಫ್ತು ವಹಿವಾಟು ಯಥಾಸ್ಥಿತಿ

ನವದೆಹಲಿ: ಜೂನ್‌ ತಿಂಗಳಲ್ಲಿ ಭಾರತದ ರಫ್ತು ವಹಿವಾಟಿನಲ್ಲಿ ಹೆಚ್ಚಿನ ವ್ಯತ್ಯಾಸ ಕಂಡುಬಂದಿಲ್ಲ. ಜೂನ್‌ನಲ್ಲಿ ಭಾರತದ ರಫ್ತು ವಹಿವಾಟಿನ ಮೊತ್ತ ₹ 3 ಲಕ್ಷ ಕೋಟಿ (35.14 ಬಿಲಿಯನ್ ಡಾಲರ್) ಆಗಿದೆ. ಹಿಂದಿನ ವರ್ಷದ ಜೂನ್‌ ತಿಂಗಳಲ್ಲಿಯೂ ರಫ್ತು ವಹಿವಾಟಿನ ಮೊತ್ತವು ಸರಿಸುಮಾರು ಇಷ್ಟೇ ಇತ್ತು (35.16 ಬಿಲಿಯನ್ ಡಾಲರ್).

ಆದರೆ ಆಮದು ವಹಿವಾಟಿನಲ್ಲಿ ತುಸು ಇಳಿಕೆ ಕಂಡುಬಂದಿದೆ. ಈ ವರ್ಷದ ಜೂನ್‌ನಲ್ಲಿ ₹4.63 ಲಕ್ಷ ಕೋಟಿ (53.92 ಬಿಲಿಯನ್ ಡಾಲರ್) ಮೌಲ್ಯದ ಆಮದು ವಹಿವಾಟು ನಡೆದಿದೆ. ಕಚ್ಚಾ ತೈಲ ಹಾಗೂ ಚಿನ್ನದ ಆಮದು ತಗ್ಗಿದ ಪರಿಣಾಮವಾಗಿ ಒಟ್ಟಾರೆ ಆಮದು ವಹಿವಾಟಿನ ಮೌಲ್ಯದಲ್ಲಿ ಇಳಿಕೆ ಕಂಡುಬಂದಿದೆ.

ಕಚ್ಚಾ ತೈಲದ ಆಮದು ಶೇ 8.37ರಷ್ಟು ಹಾಗೂ ಚಿನ್ನದ ಆಮದು ಶೇ 25.73ರಷ್ಟು ಕಡಿಮೆ ಆಗಿದೆ.