ಗೋಧಿ ಮೇಲಿನ ಎಂಎಸ್‌ಪಿ ಹೆಚ್ಚಳ
ನವದೆಹಲಿ: ಕೇಂದ್ರ ಸರ್ಕಾರವು ಗೋಧಿ ಮೇಲಿನ ಕನಿಷ್ಠ ಬೆಂಬಲ ಬೆಲೆಯನ್ನು (ಎಂಎಸ್‌ಪಿ) 2024–25ನೇ ಮಾರುಕಟ್ಟೆ ಅವಧಿಗೆ ಕ್ವಿಂಟಲ್‌ಗೆ ₹150ರಷ್ಟು ಹೆಚ್ಚಳ ಮಾಡಿದೆ. ಇದರಿಂದಾಗಿ ಗೋಧಿ ಮೇಲಿನ ಎಂಎಸ್‌ಪಿ ಕ್ವಿಂಟಲ್‌ಗೆ ₹2,275ಕ್ಕೆ ಏರಿಕೆ ಆಗಿದೆ.
ಗೋಧಿ ಬೆಳೆಯುವ ಮಧ್ಯಪ್ರದೇಶ, ರಾಜಸ್ಥಾನದಂತಹ ಪ್ರಮುಖ ರಾಜ್ಯಗಳಲ್ಲಿ ವಿಧಾನಸಭೆ ಚುನಾವಣೆ ನಡೆಯುವ ಬೆನ್ನಲ್ಲೇ ಕೇಂದ್ರವು ಈ ನಿರ್ಧಾರ ತೆಗೆದುಕೊಂಡಿದೆ.
2014ರಲ್ಲಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರವು ಅಧಿಕಾರಕ್ಕೆ ಬಂದ ಬಳಿಕ ಮಾರುಕಟ್ಟೆ ಅವವಧಿಯೊಂದರಲ್ಲಿ ಎಂಎಸ್‌ಪಿಯಲ್ಲಿ ಆಗಿರುವ ಗರಿಷ್ಠ ಏರಿಕೆ ಇದಾಗಿದೆ. 2017-18, 2018-19, 2019-20 ಮತ್ತು 2023-24ರ ಅವಧಿಯಲ್ಲಿ ಕ್ವಿಂಟಲ್‌ಗೆ ₹100 ರಿಂದ ₹110ರವರೆಗೆ ಹೆಚ್ಚಳ ಮಾಡಲಾಗಿದೆ. ಆರ್ಥಿಕ ವ್ಯವಹಾರಗಳ ಸಚಿವ ಸಂಪುಟ ಸಮಿತಿಯು ಈ ನಿರ್ಧಾರ ತೆಗೆದುಕೊಂಡಿದೆ.
2023–24ನೇ ಮಾರುಕಟ್ಟೆ ಅವಧಿಗೆ (ಏಪ್ರಿಲ್‌–ಮಾರ್ಚ್‌) ಗೋಧಿಗೆ ಕ್ವಿಂಟಲ್‌ಗೆ ₹2,125 ರಷ್ಟು ಎಂಎಸ್‌ಪಿ ಇದೆ.
ಹಿಂಗಾರು ಅವಧಿಯಲ್ಲಿ ಬೆಳೆಯುವ 6 ಬೆಳೆಗಳ ಮೇಲಿನ ಎಂಎಸ್‌ಪಿ ಹೆಚ್ಚಿಸಲು ಸಮಿತಿಯು ಒಪ್ಪಿಗೆ ನೀಡಿದೆ ಎಂದು ಸಚಿವ ಅನುರಾಗ್ ಠಾಕೂರ್ ತಿಳಿಸಿದ್ದಾರೆ. ಕಡಲೆಕಾಳು, ಬಾರ್ಲಿ, ಚೆನ್ನಂಗಿ ಬೇಳೆ (ಮಸೂರ್), ಸಾಸಿವೆ ಮತ್ತು ಕುಸುಬೆ ಮೇಲಿನ ಎಂಎಸ್‌ಪಿಯನ್ನೂ ಹೆಚ್ಚಿಸಲಾಗಿದೆ.
2023–24ನೇ ಬೆಳೆ ವರ್ಷದಲ್ಲಿ (ಜುಲೈ–ಜೂನ್) 11.4 ಕೋಟಿ ಟನ್‌ ಗೋಧಿ ಉತ್ಪಾದನೆ ಆಗುವ ಅಂದಾಜನ್ನು ಕೃಷಿ ಸಚಿವಾಲಯ ಮಾಡಿದೆ. 2022–23ರ ಅವಧಿಯಲ್ಲಿ ₹11.26 ಲಕ್ಷ ಟನ್‌ ಉತ್ಪಾದನೆ ಅಗಿತ್ತು. ಸಚಿವಾಲಯದ ಪ್ರಕಾರ, ಗೋಧಿ ಬಿತ್ತನೆಗೆ ಸಾಕಷ್ಟು ಬೀಜ ಪೂರೈಕೆ ಆಗಿದೆ.
ಎಂಎಸ್‌ಪಿ ವಿವರ (ಕ್ವಿಂಟಲ್‌ಗೆ)
ಬೆಳೆ;2023–24;2024–25;ಏರಿಕೆ
ಗೋಧಿ;₹2,125;₹2,275;150
ಬಾರ್ಲಿ;₹1,735;₹1,850;115
ಸಾಸಿವೆ;₹5,450;₹5,650;₹200
ಚೆನ್ನಂಗಿ ಬೇಳೆ;₹6,000;₹6,425;₹425
ಕುಸುಬೆ; ₹5,650;₹5,800;₹150
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.