ಆರೋಗ್ಯ ವಿಮೆ ವ್ಯಾಪ್ತಿಗೆ ‘ಕೋವಿಡ್‌’ ಪರಿಹಾರ

ಮುಂಬೈ: ಬಹುತೇಕ ಎಲ್ಲ ಆರೋಗ್ಯ ವಿಮೆ ಪಾಲಿಸಿಗಳು ‘ಕೋವಿಡ್‌–19’ ಒಳಗೊಂಡಂತೆ ಸಾಂಕ್ರಾಮಿಕ ಕಾಯಿಲೆಗಳಿಗೆ ಪರಿಹಾರ ಒದಗಿಸುವ ಸೌಲಭ್ಯ ಒಳಗೊಂಡಿವೆ ಎಂದು ಸಾಮಾನ್ಯ ವಿಮೆ ಮಂಡಳಿ ತಿಳಿಸಿದೆ.

ಸಾಮಾನ್ಯ ವಿಮೆ ಕಂಪನಿಗಳು ತಮ್ಮ ಹಾಲಿ ಪಾಲಿಸಿಗಳಲ್ಲಿ ‘ಕೋವಿಡ್‌–19’ ಪ್ರಕರಣಗಳಿಗೆ ಪರಿಹಾರ ಒದಗಿಸಬೇಕು. ಇದಕ್ಕೆ ಸಂಬಂಧಿಸಿದ ಪ್ರಕರಣಗಳನ್ನು ತ್ವರಿತವಾಗಿ ಇತ್ಯರ್ಥಪಡಿಸಬೇಕು ಎಂದು ವಿಮೆ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರವು (ಐಆರ್‌ಡಿಎಐ) ಬುಧವಾರ ಹೇಳಿಕೆ ನೀಡಿತ್ತು. ಇದರ ಬೆನ್ನಲ್ಲೇ ಸ್ಪಷ್ಟನೆ ನೀಡಿರುವ 44 ಸಾಮಾನ್ಯ ವಿಮೆ ಕಂಪನಿಗಳ ಉನ್ನತ ಮಂಡಳಿಯು ಈ ವಿವರಣೆ ನೀಡಿದೆ.

‘ಸದ್ಯ ಜಾರಿಯಲ್ಲಿ ಇರುವ ಆರೋಗ್ಯ ವಿಮೆಗಳಲ್ಲಿ ಎಲ್ಲ ಬಗೆಯ ಸಾಂಕ್ರಾಮಿಕ ಕಾಯಿಲೆಗಳಿಗೆ ವಿಮೆ ಸೌಲಭ್ಯ ಇದೆ’ ಎಂದು ಮಂಡಳಿಯ ಅಧ್ಯಕ್ಷ ಎ. ವಿ. ಗಿರಿಜಾ ಕುಮಾರ್‌ ಹೇಳಿದ್ದಾರೆ.