ಇಂಧನ ಬೇಡಿಕೆ ಶೇ -11.5ರಷ್ಟು ಕುಸಿಯಲಿದೆ: ಫಿಚ್‌ ಸಲ್ಯೂಷನ್ಸ್‌
ನವದೆಹಲಿ: ಕೋವಿಡ್‌–19 ಸೃಷ್ಟಿಸಿರುವ ಬಿಕ್ಕಟ್ಟಿನಿಂದಾಗಿ ಭಾರತದ ಇಂಧನ ಬೇಡಿಕೆಯು 2020ರಲ್ಲಿ ಶೇ (–) 11.5ರಷ್ಟು ಇಳಿಕೆ ಆಗಲಿದೆ ಎಂದು ಫಿಚ್‌ ಸಲ್ಯೂಷನ್ಸ್‌ ತಿಳಿಸಿದೆ.
ಇಂಧನ ಬೇಡಿಕೆಯು ಶೇ (–) 9.4ರಷ್ಟು ಇಳಿಕೆ ಆಗಲಿದೆ ಎಂದು ಈ ಹಿಂದೆ ಹೇಳಿತ್ತು. ಆದರೆ ದೇಶದ ಆರ್ಥಿಕ ಬೆಳವಣಿಗೆ ಮುನ್ನೋಟವು ಇನ್ನಷ್ಟು ಕುಸಿತ ಕಾಣಲಿದ್ದು, ಅದಕ್ಕೆ ಅನುಗುಣವಾಗಿ ಇಂಧನ ಬೇಡಿಕೆಯನ್ನೂ ಪರಿಷ್ಕರಣೆ ಮಾಡಲಾಗಿದೆ. ಜಿಡಿಪಿಯು ಶೇ (–) 4.45ರಷ್ಟಕ್ಕೆ ಬದಲಾಗಿ ಶೇ (–) 8.6ರಷ್ಟಿರಲಿದೆ ಎಂದು ಹೇಳಿದೆ.
ಗ್ರಾಹಕ ಮತ್ತು ಕೈಗಾರಿಕಾ ಬಳಕೆಯ ಇಂಧನ ಬೇಡಿಕೆ ತೀವ್ರ ಕುಸಿತ ಕಂಡಿದೆ. ಕೊರೊನಾ ವೈರಸ್‌ ಹರಡುವಿಕೆ ನಿಯಂತ್ರಣಕ್ಕೆ ಬಂದ ಬಳಿಕ ಹಾಗೂ ಆರ್ಥಿಕ ಚಟುವಟಿಕೆಗಳು ಸಹಜ ಸ್ಥಿತಿಗೆ ಬಂದ ಮೇಲೆ 2021 ಮತ್ತು 2022ರಲ್ಲಿ ಜಿಡಿಪಿ ಶೇ 5ರಷ್ಟು ಬೆಳವಣಿಗೆ ಕಾಣಲಿದೆ ಎಂದೂ ಹೇಳಿದೆ.
ದೇಶದಾದ್ಯಂತ ಜಾರಿಯಲ್ಲಿದ್ದ ಲಾಕ್‌ಡೌನ್‌ ಮೇ 31ರಿಂದ ತೆರವಾಗಿದೆ. ಆದರೆ, ರಾಜ್ಯಗಳ ಮಟ್ಟದಲ್ಲಿ ಈಗಲೂ ಲಾಕ್‌ಡೌನ್‌ ನಿರ್ಬಂಧಗಳು ಜಾರಿಯಲ್ಲಿವೆ. ಇದರಿಂದ ಆರ್ಥಿಕ ಚೇತರಿಕೆಗೆ ಅಡ್ಡಿಯಾಗುತ್ತಿದೆ.
ಗರಿಷ್ಠ ಪ್ರಮಾಣದ ನಿರುದ್ಯೋಗ ಮತ್ತು ವರಮಾನ ನಷ್ಟದಿಂದಾಗಿ ಗ್ರಾಹಕರ ಖರೀದಿ ಸಾಮರ್ಥ್ಯ ಕುಗ್ಗಿದೆ. ಇದರಿಂದ ವಾಣಿಜ್ಯ ವಹಿವಾಟುಗಳ ಮೇಲಿನ ಹೂಡಿಕೆಯೂ ಕಡಿಮೆಯಾಗುವಂತಾಗಿದೆ. ಲಾಕ್‌ಡೌನ್‌ನಿಂದಾಗಿ ಸಾರಿಗೆ ವಲಯವು ಅತಿ ಹೆಚ್ಚಿನ ನಷ್ಟಕ್ಕೆ ಗುರಿಯಾಗಿದೆ ಎಂದೂ ಹೇಳಿದೆ.
ಆಗಸ್ಟ್‌ನಲ್ಲಿ ಬೇಡಿಕೆ ಇಳಿಕೆ
ಜೆಟ್‌ ಇಂಧನ-46.6%
ಡೀಸೆಲ್‌-25%
ಪೆಟ್ರೋಲ್-16.1%
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.