ಟ್ರಾಯ್ ಅಧ್ಯಕ್ಷರಾಗಿ ಪಿ.ಡಿ. ವಘೇಲಾ ನೇಮಕ

ನವದೆಹಲಿ: ಹಿರಿಯ ಅಧಿಕಾರಿ ಪಿ.ಡಿ. ವಘೇಲಾ ಅವರನ್ನು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರದ (ಟ್ರಾಯ್) ಅಧ್ಯಕ್ಷರನ್ನಾಗಿ ನೇಮಿಸಿ ಕೇಂದ್ರ ಸರ್ಕಾರ ಸೋಮವಾರ ಆದೇಶ ಹೊರಡಿಸಿದೆ.

ವಘೇಲಾ ಅವರು 1986ನೇ ಬ್ಯಾಚಿನ, ಗುಜರಾತ್ ಕೇಡರ್‌ನ ಐಎಎಸ್‌ ಅಧಿಕಾರಿ. ಅವರನ್ನು ಮೂರು ವರ್ಷಗಳ ಅವಧಿಗೆ ಅಥವಾ 65 ವರ್ಷ ವಯಸ್ಸಾಗುವವರೆಗೆ ಟ್ರಾಯ್ ಅಧ್ಯಕ್ಷರನ್ನಾಗಿ ನೇಮಿಸಲಾಗಿದೆ.

ಆರ್‌.ಎಸ್. ಶರ್ಮ ಅವರು ಬುಧವಾರ ನಿವೃತ್ತಿಯಾಗಲಿದ್ದು, ಅವರ ಜಾಗಕ್ಕೆ ಈ ನೇಮಕ ನಡೆದಿದೆ.