ವೆಚ್ಚ ಏರಿಕೆ ತಯಾರಿಕಾ ವಲಯದ ಗುರಿಗೆ ಅಡಚಣೆ: ವರದಿ

ನವದೆಹಲಿ: ಹೆಚ್ಚುತ್ತಿರುವ ತಯಾರಿಕಾ ವೆಚ್ಚವು, ದೇಶದ ತಯಾರಿಕಾ ವಲಯದ ಗುರಿಗೆ ಅಡಚಣೆ ಉಂಟು ಮಾಡಬಹುದು ಎಂದು ಸಿಯುಟಿಎಸ್‌ ಇಂಟರ್‌ನ್ಯಾಷನಲ್ ವರದಿ ತಿಳಿಸಿದೆ.

ಪ್ರಸ್ತುತ ದೇಶದಲ್ಲಿ ಅಲ್ಯೂಮಿನಿಯಂಗೆ 53 ಲಕ್ಷ ಟನ್‌ನಷ್ಟು ಬೇಡಿಕೆ ಇದೆ. ಇದು 2030ರ ವೇಳೆಗೆ 83 ಲಕ್ಷ ಟನ್‌ಗೆ ಹೆಚ್ಚಳವಾಗುವ ನಿರೀಕ್ಷೆ ಇದೆ ಎಂದು ಹೇಳಿದೆ. 

ಪ್ರಸ್ತುತ ಇರುವ ಆಮದು ಸುಂಕದ ವಿಧಾನವು ಎಂಎಸ್‌ಎಂಇ ವಲಯದ ಉದ್ಯಮಗಳಿಗೆ ಯಾವ ರೀತಿ ಅಡ್ಡಿಪಡಿಸುತ್ತಿದೆ ಎಂದು ವರದಿ ತಿಳಿಸಿದೆ.

ಅಂತರರಾಷ್ಟ್ರೀಯ ಮಾನದಂಡಕ್ಕೆ ಹೋಲಿಸಿದರೆ ದೇಶದ ಅಲ್ಯೂಮಿನಿಯಂ ಬೆಲೆ ಹೆಚ್ಚಿದೆ. ಇದು ದೇಶದಲ್ಲಿನ ಅಲ್ಯೂಮಿನಿಯಂ ತಯಾರಕರಿಗೆ ಅನನಕೂಲ ಉಂಟು ಮಾಡಲಿದೆ. ಈ ದರ ಅಂತರವು ಹೆಚ್ಚಿನ ಪ್ರಮಾಣದಲ್ಲಿ ಅಲ್ಯೂಮಿನಿಯಂ ಬಳಕೆ ಮಾಡುವ ನಿರ್ಮಾಣ ವಲಯ, ನವೀಕರಿಸಬಹುದಾದ ಇಂಧನ ಮೂಲಸೌಕರ್ಯ, ವಿದ್ಯುತ್‌ಚಾಲಿತ ವಾಹನಗಳು ಮತ್ತು ಎಲೆಕ್ಟ್ರಾನಿಕ್ಸ್‌ ವಲಯಗಳ ಮೇಲೆ ಪರಿಣಾಮ ಬೀರಲಿದೆ ಎಂದು ಹೇಳಿದೆ.

ಕಡಿಮೆ ತಯಾರಿಕಾ ವೆಚ್ಚದಿಂದ ದೇಶದ ಎಂಎಸ್‌ಎಂಇ ವಲಯದ ಅಲ್ಯೂಮಿನಿಯಂ ಕೈಗಾರಿಕೆಗಳು, ಆಮದು ಉತ್ಪನ್ನಗಳ ವಿರುದ್ಧ ಪರಿಣಾಮಕಾರಿಯಾಗಿ ಸ್ಪರ್ಧೆ ಮಾಡಲು ಅನುವು ಮಾಡಿಕೊಡುತ್ತದೆ. ಅಲ್ಲದೆ, ಮಾರುಕಟ್ಟೆಯಲ್ಲಿ ತಮ್ಮ ಸ್ಥಾನವನ್ನು ವಿವಿಧ ಉತ್ಪನ್ನಗಳ ತಯಾರಿಕೆ ಮೂಲಕ ವಿಸ್ತರಿಸುತ್ತದೆ ಎಂದು ಹೇಳಿದೆ.