ಸ್ವಾವಲಂಬನೆ: ರಾಜ್ಯ ಸೌರಶಕ್ತಿ ತಯಾರಕರ ನಿರ್ಧಾರ

ಬೆಂಗಳೂರು: ಇದುವರೆಗೆ ಆಮದನ್ನೇ ಹೆಚ್ಚಾಗಿ ಅವಲಂಬಿಸಿದ್ದ ರಾಜ್ಯದಲ್ಲಿನ ಸೌರಶಕ್ತಿ ಉಪಕರಣಗಳ ತಯಾರಕರು, ಬಿಡಿಭಾಗಗಳನ್ನು ಸ್ಥಳೀಯವಾಗಿಯೇ ತಯಾರಿಸುವುದರ ಕಡೆಗೆ ಗಮನ ನೀಡಲು ನಿರ್ಧರಿಸಿದ್ದಾರೆ.

ಸೌರಶಕ್ತಿಯ ಗಾಜಿನ ಫಲಕಗಳ ತಯಾರಿಕೆಯಲ್ಲಿ ಬಳಕೆಯಾಗುವ ಗರಿಷ್ಠ ಗುಣಮಟ್ಟದ ಮತ್ತು ಕಡಿಮೆ ಬೆಲೆಯ ಗಾಜಿನ ಕೊಳವೆಗಳ ತಯಾರಿಕಾ ಘಟಕವನ್ನು ದೇಶದಲ್ಲಿಯೇ ಸ್ಥಾಪಿಸುವುದಕ್ಕೆ ಗಮನ ನೀಡಲು ತೀರ್ಮಾನಿಸಿದ್ದಾರೆ. ಬಿಡಿಭಾಗಗಳಿಗಾಗಿ ಚೀನಾ ಸೇರಿದಂತೆ ಏಷ್ಯಾದ ಇತರ ದೇಶಗಳ ಮೇಲಿನ ಅವಲಂಬನೆ ತಗ್ಗಿಸಿ ಸ್ವಾವಲಂಬನೆಯತ್ತ ಸಾಗಲು ಸೌರಶಕ್ತಿ ಉಪಕರಣಗಳ ತಯಾರಕರ ಸಂಘವು (ಕೆಎಎಸ್‌ಎಂಎ) ನಿರ್ಧರಿಸಿದೆ.

ಕೇಂದ್ರ ಸರ್ಕಾರದ ಆತ್ಮನಿರ್ಭರ ಮತ್ತು ಭಾರತದಲ್ಲಿಯೇ ತಯಾರಿಸಿ ಆಶಯ ಸಾಕಾರಗೊಳಿಸುವ ನಿಟ್ಟಿನಲ್ಲಿ ದಿಟ್ಟ ಹೆಜ್ಜೆ ಇಡಲು ಕ್ರಮ ಕೈಗೊಂಡಿದೆ.

ಬೆಂಗಳೂರಿನಲ್ಲಿ ನಡೆದ ಸಂಘದ ಸಭೆಯಲ್ಲಿ ಸುಪ್ರೀಂ ಸೋಲಾರ್‌, ನ್ಯೂಟೆಕ್‌ ಸೋಲಾರ್‌, ಸನ್‌ರೈಸ್‌ ಸೋಲಾರ್‌, ಸನ್‌ಜೋನ್‌ ಸಿಸ್ಟಮ್ಸ್‌, ಸನ್‌ವ್ಯೂ ಸೋಲಾರ್‌, ಸೋಲಾರ್‌ ಹೈಟೆಕ್‌, ಹೆಲಿಅಸ್ ಸೋಲಾರ್‌ನ ಪ್ರತಿನಿಧಿಗಳು ಭಾಗವಹಿಸಿದ್ದರು.